Зорлық-зомбылыққа жол жоқ

Аудандық полиция бөлімі тұрмыстық зорлық-зомбылық қылмыстарына қарсы іс-шаралар легін жандандырып, нақты жұмыстар жүргізуде. Полиция қызметкерлері отбасылық жанжалдардың соңғы өкінішпен аяқталмауы үшін түсіндірме жұмыстарын да ұйымдастыруда.

Аудандық полиция бөлімінің мәліметінше, шілде айынан бас­тап «102» бірыңғай арнасына отбасылық-тұрмыстық зорлық-зомбылық бойынша 13 хабарлама келіп түскен. Хабарламалар тіркеліп, құқық қорғаушылар әр істі мұқият зерделеп, барлығына әкімшілік шара қолданылған. Сонымен қатар полиция қызметкерлерінің көмегіне жүгінген 13 отбасыға қатысты қорғау нұсқамасы қабылданған. Осы ретте аудандық сот арқылы 7 азаматқа алкогольдік ішімдік ішуге тыйым салуға ерекше талап тағайындалғанын айтып өткеніміз жөн.

– Отбасындағы тұрмыстық зор­лық-зом­былықтың алдын алу мақ­сатында бө­лімнің учаскелік полиция инс­пек­торлары мен әйелдерге қарсы зор­лық-зомбылықтан қорғау то­бы­ның инспекторы халық арасында түсіндірме жұмыстары жүргі­зу­де. Бұл бағытта орын алатын заңбұзушылықтар департаменттің қатаң бақылауында. Сондықтан қоғам тыныштығын бұзып, отбасы берекесін қашыратындар міндетті түрде жауап­кершілікке тартылады. Қаза­қылықтың қаймағы бұзылмаған Сыр өңірі, оның ішінде Сырдария ауданының отбасылары өзге өңір­лерге үлгі-өнеге көрсетуі тиіс деп есептейміз, – дейді аудандық полиция бөлімі бастығының міндетін уақытша атқарушы Азамат Оспанов.

Сонымен қатар ауданда жасөс­пірімдер арасында құқыққа қайшы іс-әре­кет­терге тосқауыл қою және кәмелетке толмағандардың жү­ріс тұрыстарына бақылау жасау мақсатында «Жасөспірім» жедел профилактикалық іс-шарасы ұйым­дас­тырылуда. Іс-шара аясында колледжде, мектептерде кездесулер өткізілуде.

«Тт» ақпарат

Фото: ашық дереккөзден