Ерлікке тағзым
Аудандық мәдениет үйінде Отан қорғаушылар күні мен Ұлы Жеңіс мерекесінің 78 жылдығына арналған салтанатты жиын өтті. Іс-шараға аудан әкімі Берік Сәрменбаев қатысып, ардагерлер мен аудан тұрғындарын қос мерекемен құттықтады.Ең алдымен аудан әкімі орталық саябақта әскер қатарына баратын жастарға жолдама тапсыру рәсіміне қатысты. Сонымен қатар жақын күндері Отан алдындағы борышын өтеп келген 1 азаматқа әскери билет берілді. Әскерден оралған жігіт жас сарбаздарға, аудан жастарына ұран тастап, Отанға қызмет ету міндет екенін жеткізді.
Іс-шара барысында аудан мектептерінің бастапқы әскери даярлық пәні мұғалімдерінің қатысуымен саптық қарау, улануға қарсы дайындық және автомат шашу сынды әскери спорттық дайындықтары пысықталды.
Ал аудандық мәдениет үйіндегі салтанатты шарада сахнаға Мемлеттік Ту енгізіліп, Гимн шырқалды. Содан соң ауданның құқық қорғау саласына қызметке қабылданып жатқан мемлекеттік қызметшілер Ерсұлтан Ержанов пен Нариман Махановтың ант беру рәсімі өтті. Аудан басшысы құттықтау сөзінде қос мерекенің ерлікке тағзым етіп, елді отансүйгіштікке шақыратын мейрам екенін айтып өтті.
– Жеңіс – бүкіл жігерімен жеңіске ұмтылған миллиондаған жандардың арман-тілегі. Бұл мереке – ержүрек, қаһарман жауынгерлердің жарық өмір үшін аянбай ұмтылған үлесінің, жауға қарсы жан аямай күрескен әрбір жауынгердің мәңгі өлмес өр рухының алдында тағзым ететін күн. Халқының бейбіт ғұмыры үшін соғыс майданында от кешкен батырлардың ерлігі мен өрлігі жадымыздан мәңгі өшпейді. Ұлы Жеңіс мерекесін алып келген ардақты ардагерлеріміз – біз үшін батылдық пен ерліктің, қаһармандық пен елдіктің нышаны. Біз бүгінгі қол жеткізген бейбіт күніміз, бағындырған әрбір белестеріміз үшін Ұлы Отан соғысы ардагерлері мен тыл еңбеккерлеріне қарыздармыз. Майдангерлер мен тыл ардагерлерінің ерлігі, еңбегі тарихта мәңгі қалады, – деді аудан басшысы.
Іс-шара барысында театрландырылған қойылым көрсетілді. Қойылымда соғыс жылдарындағы оқиғалар, жас азаматтардың майдан даласына аттануы, олардың елге хат жазуы, Отанды қорғау үшін соғысқа аттанған азаматтарды жұртшылықтың сағына күтуі бейнеленді. Сондай-ақ майдангерлердің еңбегі мен ерлігі, батырлығы мен батылдығы көрініс тапты.Сонымен қатар аудандық қорғаныс бөлімі жасақтау тобының әскери қызметке шақыру жөніндегі инспекторы Жәнібек Есепбаев, №137 орта мектептің бастапқы әскери дайындық пәні мұғалімі Рүстем Зейнуллаев, аудандық полиция бөлімінің көші-қон қызметі тобының инспекторы, полиция майоры Айдос Алматов, аудандық полиция бөлімінің азаматтық және қызметтік қару айналымын бақылау тобының инспекторы, полиция аға лейтенанты Әлихан Аппазов, аудан әкімі аппараты жұмылдыру дайындығы және азаматтық қорғаныс бөлімінің маманы Дархан Күзербаев, Сырдария ауданы №12 өрт сөндіру бөлімінің қарауыл бастығы, азаматтық капитаны Олжас Сейпулов, Асқар Тоқмағамбетов ауылдық округінде орын алған 3 тұрғын үйдегі төтенше жағдай кезінде ерікті жастарды ұйымдастыра отырып, өртті сөндіруге атсалысқан Ерлан Нұрғалиев аудан әкімінің Алғыс хатымен марапатталды. Қос мерекеге арналған іс-шарада патриоттық әндер шырқалып, ардагерлерге құрмет көрсетілді.
Айта кетейік, қазіргі таңда Қызылорда облысында Ұлы Отан соғысының 6 ардагері мен оларға теңестірілген 4 177 азамат бар. Оларға мемлекет тарапынан ай сайын орта есеппен 178 мың теңге зейнетақы және 55 200 теңге арнаулы мемлекеттік жәрдемақы төленуде.
Ал ауданда ғасыр куәгері, майдангер Яхия Тасыров бар. Жеңіс мерекесіне орай қарт жауынгерге 1,5 млн теңге көлемінде бірретік жәрдемақы беріледі.
А.ҚҰРМАНАЙТЕГІ
