Жеңіс мерекесі тойланды
Ұлы Жеңіс мерекесінің 77 жылдығына арналған мерекелік іс-шара «Тағзым» алаңында өтті. Іс-шараға аудан әкімі Мұрат Ергешбаев, аудандық мәслихат хатшысы Е.Әжікенов, облыстық мәслихат депутаты Р.Есенов бастаған ел ағалары, ардагерлер және аудан тұрғындары қатысып, соғыста қаза болғандарға арнап «Тағзым» алаңының алдына салтанатты түрде гүл шоқтарын қойды.Жиналғандар майдан даласында қаза тапқандарды бір минут үнсіздікпен еске алып, ауданның бас имамы А.Асқаров әруақтардың рухына Құран бағыштады. Мерекелік жиында аудан әкімі жұртшылықты өшпес ерлік пен өлшеусіз даңқтың мерекесімен құттықтады.
– Ұлы Жеңіс күні – бейбіт өмірді сыйлаған ардагерлеріміз бен тыл еңбеккерлерінің қажымас қайраты мен қайсар рухына тағзым ететін қастерлі күн. Сырдария ауданынан Ұлы Отан соғысына 7399 азамат аттанып, олардың 4345-і туған жерге оралмады. Олар Отан үшін шейіт болды. Ал бүгінде соғыс және еңбек ардагері, ғасыр жасаған батагөй қариямыз Яхия Тасыров арамызда жүр. Қарт майдангерге құрмет көрсетіп, ардақ тұту, оларды қамқорлыққа алу – перзенттік парызымыз, – деді аудан басшысы.
Іс-шара аудандық мәдениет үйінің көркемөнерпаздары концерттік бағдарламасына ұласып, соғыс жылдарындағы әндер шырқалды.
«ТТ» ақпарат
