Серіктестік техникалары жаңартылуда

Бүгінде шаруалар егін егу қамына дайындық үстінде. Осы шақта олар ақ егісті болып та қойды. Енді Сыр­дың бас­ты дақылы – күріш орналастыруға қамдануда. Мұндай жұмыстар «Шаған Жер» ЖШС-де қызу жүргізілуде.

Шаруашылық жұмысы­ның жан­данып, егіннен мол өнім алу үшін техникалар­дың сақадай сай болғаны керек. Осыны білетін серік­тестік бас­шылығы биыл жа­ңа техникалар алған.

– Егінді төкпей-шашпай жи­нап, одан мол өнім алуда тех­никалық базаның ат­­­­қа­­рар рөлі ерекше. Осы орайда, ағымдағы жылы се­ріктестіктің базасы кеңейіп, жаңа техникалар алынды. Жер тегістеуге, егін егуге, оны жинауға тиімді, қуатты техникалар шаруашылыққа жеткізілді. Атап айтқанда, «Class Axion 820» маркалы 6 трактор, «Zoomlion 1604» маркалы 3 трактор, «Zoomlion 904» маркалы 3 трактор, «Case 4099» маркалы комбайн, жа­­ңа түрік соқасы, «Class Lexion 750» маркалы 2 ком­­байн, 3 лазерлік жос­парлаушы, «Zoomlion 160» маркалы бульдозер, экскаватор тиегіш, телескоптық жүк тие­гіш, дискілі тырма 4.5 метрлік және «MacDon» маркалы өздігінен жүріп шөп оратын машина техникасы бар. Бұл техникалар жұмысымызды жылдамдатады, – дейді «Шаған Жер» ЖШС-нің директоры Жеңісбек Сыздықов.

Шаруашылық күріш өн­ді­рісінен бөлек ата-кәсіп — мал шаруа­шы­лы­ғымен де айналысады. Халықтың негізгі тіршілік кө­зіне айнал­ған шаруада бү­гінде төрт аза­мат тұрақты жұ­мыспен қам­тылуда.

– Алғаш рет 2020 жылы шаруашылықта мал басы са­ны нөлдік көрсеткіш болатын. Биыл мал басының жалпы саны 298-ді құрап отыр. Күніне екі мезгіл сауылатын сауынды сиырларымыздан тәулегіне 80 литрден 160 литр сүт өндіреміз. Алынған сүттен қатық, айран, құрт өнімдерін шыға­рып ауылдағы сауда дүкен сөре­сіне қойылады. Осылайша, халыққа тиімді ба­ғада ұсынып отырмыз. Был­тыр ет-сүт өнім­дерін сататын арнайы дүкен аштық. Бұл да халық игілігі үшін жасалып жатқан үлкен қадамдар. Одан бөлек шаруашылықта 147 бас жылқы, оның ішінде 51 бие бар. Пандемия кезін­де тұрғын­дарға тегін саумал ұйымдас­тырылды. Сонымен қатар өткен жылы 50 қой алынып, биыл 14 қозы төлденіп басталды, – дейді мал шаруашылығының мең­герушісі Ұлтай Смағұл­қызы.

Е.БЕРКІНБАЕВ