Ардагер-ұстаздар ұлттық құндылықтарды дәріптеді

1 наурыз – Алғыс айту күніне орай  №36 Ә.Тәжібаев атындағы мектеп-лицейінің акт залында «Қазақтың даналық, ғибратты сөздері» тақырыбында ардагер-ұстаздар арасында байқау болып өтті.

Ел қадірін білген халқымыз ел ішінен шыққан тума дарын шешендерді, ақылгөй қарияларды дәріптеген. Олардан жас балалар өнеге алған. Бабалар сөзі – кешегі өткен қариялардан, ғұлама ойшылдар мен шешен-билерден, ақын-жыраулар мен сал-серілерден мұра, мирас болып қалған ұлы тәрбие құралы.

Ұлттық өнердің аясын кеңейтіп, ата-әжелеріміздің даналықтары арқылы жастарға ұлттық тәрбие беру мақсатында «Қазақтың даналық, ғибратты сөздері» атты аудандық байқауды жас айтыскер ақын Мұхамеджан Мансұров "Арнаумен" ашты.

Мерейлі күнмен құттықтап, байқауға қатысушы ардагер-ұстаздарға сәттілік тілеген Сырдария ауданының Құрметті азаматы, білім саласы ардагерлер кеңесінің төрағасы Г.Әбілова мен білім бөлімінің басшысы Б.Жәнібеков салтанатты іс-шараның маңыздылығына тоқталды.

Рухани құндылықтарды дәріптеуге бағытталған байқауға барлығы 15 ардагер-ұстаз қатысты. Олардың қатарында Бесарық аулынынан Оразкүл Ахметова, Ақжарма ауылынан Патыма Құсейінова, Н.Ілиясов ауылынан Мәлике Алматова, Қоғалыкөл ауылынан Сақыпжамал Бекмағанбетова, Тереңөзек кентінен Мирамкүл Серікбаева, Сұлупан Шамшадинова, Роза Үмбетаева, Айдарлы ауылынан Ұлтай Бектаева, А.Тоқмағамбетов ауылынан Назнуш Әбибуллаева, Қалжан ахун ауылынан Райкүл Нұрманова, Шаған ауылынан Шегебай Башенов, О.Мәлібаевтан Айман Әбілдаева, Аманкелді ауылынан Ерғали Құлымбетов, Іңкәрдария ауылынан Марал Сағындықова.

Үш кезең бойынша сайысқа түскен ардақты ардагер-ұстаздар "Ескірмейтін есті сөз" кезеңі бойынша ғибратты әңгіме айтса, екінші кезең "Бата беруде" дала өркениетінің көне мәдениетінің үлгісін көрсетті. Үшінші кезең бойынша жыр, терме айтып, өнерлерін ортаға салды.

Аталған байқауға  білім саласы ардагерлер кеңесінің төрағасы Г.Әбілова, аудандық ардагерлер кеңесінің төрағасы М.Келдібай, "Сырдария ауданының әйелдер" қоғамдық бірлестігінің төрайымы Ұ.Жаналиева, Сырдария ауданының Құрметті азаматы, аудандық «Құрақтың Досжаны» атындағы халықтық ұлт аспаптар оркестрінің жетекшісі С.Садуақасов, аудандық «Қазақ тілі» қоғамының төрағасы Ш.Нұрсейітов қазылық етті.

Байқау қорытындысы бойынша І орынмен Ақжарма ауылының ардагер-ұстазы П.Құсейінова, ІІ орынмен Бесарық ауылының ардагер-ұстазы О.Ахметова және Аманкелді ауылының ардагер-ұстазы Е.Құлымбетов, ІІІ орынмен А.Тоқмағанбетов аулының ардагер-ұстазы Н.Әбибуллаева, Қалжан ахун аулының ардагер-ұстазы Р.Нұрманова және Тереңөзек кентінің ардагер-ұстазы С.Шамшадиновалар марапатталып, білім қызметкерлері аудандық кәсіподақ комитетінің бағалы сыйлықтары табыс етілді.

Байқау қорытындысында ауданның білім саласы ардагерлер кеңесінің төрайымы Г.Әбілова, "Сырдария ауданының әйелдері" қоғамдық бірлестігінің төрайымы Ұ.Жаналиева сөз алып, қазыналы қарттарға рухани іс-шараға белсенді қатысқаны үшін алғысын білдіріп, жеңімпаздарды құттықтады.

Бибісара ЖАНӘЛІ