Яхия Тасыров – 101 жаста

Ұлы Отан соғысының ардагері, «Сырдария ауданының Құрметті азаматы» Яхия Тасыров екінші қаңтар күні 101 жасқа толды. Ғасыр ғұмыр иесі айтулы белеске зор абыроймен, үлкен қуанышпен жетіп отыр.

Отан үшін от кешкен майдангерді 101 жасқа толуымен «AMANAT» партиясы жа­нындағы «Жастар рухы» жас­тар қанаты­ның аудандағы төрағасы А.Ибрагимұлы бастаған аудан жастары, яғни бейбіт күн­нің төл ұрпақтары құттықтады. Жастар майдангерге құрмет көрсетіп, өлең оқып, ән айтып, игі тілектерін арнады.

– Сіз Сырдария ауданының ғана емес, күллі сырбойылық жастардың үлгі тұтар абыз ақсақалысыз. Жеңісті жақындатып, бізге берекеге толы бейбіт күнді сыйлаған сізге шексіз алғыс білдіреміз. Өнегелі өмір жолыңызды әркез үлгі тұтамыз. 101 жасқа толған туған күніңізбен құттықтаймыз жә­не елге батагөй қария, ақылман ардагер болып жүре беруіңізге тілектеспіз. Ғұмыр жасыңыз ұзақ, денсаулығыңыз мықты болып, ұрпағыңыздың қыз­ығын көре бе­ріңіз, – деді аудандық мәслихат депутаты А.Ибрагимұлы.

Ардақты ардагер жастарға соғыс жылдарында бастан өткерген қиындықтар туралы естеліктер айтты. Әрбір адамның бейбіт күннің қадірін білу қажет екенін атап өтті. Сондай-ақ береке мен ырыстың туы желбіреген Қазақстанның, оның ішін­де Сыр елінің дамуына тілектестігін біл­діріп, жастарға ақ батасын берді. Осылайша, жастар 101 жасқа толған қариямен кез­десіп, ақ батасын алып, көтеріңкі көңіл-күй­де тарқасты.

«ТТ» ақпарат