Жол мұраты – жету
Соңғы екі аптада аудан аумағында жол көлік оқиғаларының саны тым көбейіп кетті. Ең қиыны, апат салдарынан бір емес бірнеше адам қаза болып, бірнеше әулет қайғыдан қара жамылып, қимас жандарынан қапияда айырылып қалды. Осы ретте, әр жүргізуші жолда жүру ережелерін қатаң сақтап, өзінің де, өзгенің де өміріне залал келтірмейтіндей деңгейде автокөлік жылдамдығын бәсеңдетсе деген ұсыныс бар.Халқымызда «Жол мұраты – жету» деген тағылымы мол даналық сөз бар. Ал діттеген жерге аман жетудің маңызы бүгінде бұрынғыға қарағанда бірнеше есе артып отыр. Оған басты себеп – жолдағы ерсілі-қарсылы жүйткіген көліктер мен жеңіл автокөліктердегі жылдамдықтың шамадан тыс артуы. Соның кесірінен қаншама адамның өмірі жарты жолда үзіліп, қаншама отбасы күтпеген апат салдарынан ауыр қайғағы душар болды. Бұл ойланарлық жағдай және бүгін ойланбасақ ертең мүлдем кеш болуы да ықтимал.
Бүгінде ауданнан Қызылордаға дейінгі автокөлік жолы түгел жөнделіп, ой-шұңқыры қалпына келтірілді. Бұрын тұрғындар екі ортадағы апаттың бәрін жолдың сапасыздығымен байланыстыратын. Қандай да бір жол көлік оқиғасы болса, «Шұңқырдан қашамын деп рульге ие бола алмай қалған ғой» деп топшылайтын. Оның арғы жағында иесіз жүрген малдарды да кінәлайтындар көп еді. Ал қазір ше? Қазір бәрі өзгерді. Жол жөнделді. Тақтайдай тегіс десек те болады. Шұңқыр да жоқ, ой да жоқ. Әкімдік пен полиция бөлімі тарапынан көлік жүргізушілеріне жолда иесіз жүрген малдар болуы ықтимал екенін ескертетін бір емес, бірнеше белгі де қойылған. Сонда кінә кімнен? Кінә – жылдамдықты шамадан тыс асыратын жүргізушіден, әрине. Ал оның көлік айдап келе жатып ұйықтап кетуі, жолдан шығып кетуі, қарсы бетке қарай өтіп кетуі – ақтауға келмейтін көп сылтаудың бірі.
Жолда опат болғандардың бәрі жауапсыз, жауапкершіліктен жұрдай деп айтуға ауыз бармайды. Десек те жауапкершілікті терең сезінетіндер өте аз екені жасырын емес. Бұл сөзімізге сенбесеңіз, Қызылордаға дейін автокөлік жылдамдығын сағатына 90 шақырымнан асырмай айдап баратын жүргізуші көп пе, аз ба, өзіңіз ойланып көріңіз. Жоқ дегенде жылдамдық көрсеткіші сағатына 110, 120 шақырымды көрсетеді. Ал одан кейін кімге, қалай ренжиміз? «Ажалы шығар...» деп айту да әбестік қой мұндайда.
Жаратқан Ие пендесіне «Сақтансаң, сақтармын» дейді екен. Қарапайым өмірде сақтанудың түрлі жолы бар. Оның түпкі мәні өзгеге де, өзіңе де залал келтірмейтін іс-әрекетті дағдыға айналдырумен тығыз байланысты. Оның ішінде, көлік тізгіндегенде жылдамдықты асырмау да бар. Түйіндей айтқанда, көлік айдағанда абай болайық, ағайын!
Ақтөре ИБРАГИМҰЛЫ
