Тіршілік тынысы Tirshilik-tynysy.kz ақпараттық агенттігі
» » Адал еңбек иелері марапат төрінде

Адал еңбек иелері марапат төрінде

Қоғам тазалығы – өмір сүру мәдениетіміздің өлшемі. Сондықтан тазалық қай кезде де ауадай қажет. Ал «Birge: Taza Qazaqstan» рес­публикалық акциясы облыс орталығынан бастап, аудандар мен шал­ғай ауылдарды тазартуға, күл-қоқыстарды жинап, көшелер мен алаңдарды көркейту-көгалдандыруға ерекше септігін тигізді.

Соңғы бірнеше айда облысымызда да сенбілік жұмыстары қарқынды түр­де ұйымдастырылды. Эконауқанға мем­ле­кеттік мекеме қызметкерлерімен қатар қарапайым тұрғындар да жауап­кер­шілікпен атсалысты. Зиялы қауым өкіл­дері, ардагерлер, үкіметтік емес ұйым мүшелері, белсенді жастар ха­лыққа үн­деу жолдап, сана тазармай, аула тазармайтынын айтып, баршаға ортақ іске бір кісідей үлес қосуға ша­қырды. Соған сәйкес, ауданымызда да әр апта са­йын жалпыхалықтық сенділіктер жоғары дең­гейде ұйым­дастырылып, жұрт­шылық та­залық сақ­шыларына кө­мек көрсетті.

Көктем, жаз айларында жүргізілген тазалық жұмыстары күз айында да жал­ғасып, халықтың қоғам тазалығына көз­қарасы өзгерді. Бұл елдің бірлігін, туған жерге деген құрметі мен патриот­тық сезімін көрсетті. Осыған орай, облыс әкімі Нұрлыбек Нәлібаев «Birge: Taza Qa­zaqstan» республикалық эконауқанға бел­сенді түрде қатысқан азаматтарды ма­рапаттады.

Салтанатты іс-шарада тазалыққа ба­са мән беріп, туған жеріне шынайы жа­на­шырлықпен, құрметпен қарай­тын азаматтарға еліміздегі танымал шипа­жайларға жолдама табысталса, алда­ғы уақытта тазалығы бойынша үз­дік атан­ған ауылдарға жаңа саябақ, ойын алаңы мен бағалы сыйлықтар бері­ле­тіні жария етілді. Достық үйінде өткен іс-шарада аймақ басшысы алдымен, президенттік сайлау науқанына белсен­ділік танықтан жерлестеріне ал­ғыс біл­діріп, сырбойылықтардың ауыз­біршілігі ар­қасында Қызылорда облысы үздіктер қатарынан көрінгенін атап өтті.

– 20 қараша күні жылдың ең ауқымды әрі ең маңызды саяси оқиғасының бірі – Қазақстан Республикасы Президентінің кезектен тыс сайлауы өтті. Қашанда ауыз­біршілігі мен ынтымағынан айны­маған Сыр халқы елдің болашағы ай­қын­­далатын сындарлы сәтте Қасым-Жомарт Кемелұлы Тоқаевқа зор сенім артып, дауыс берді. Мызғымас бірлі­гіміздің, тату-тәтті тірлігіміздің, қазақы болмысымыз бен жарқын болашаққа деген халықтың зор сенімінің арқасында сайлауға қатысушылардың саны 81,07 пайызды құрап, аймағымыз үздіктер қатарынан көрініп, республика бо­йынша екінші орынға тұрақтады. Ел жаңғы­руының бастамасы ретінде маусым­ айында Ата Заңымыз Конституцияға өз­ге­­рістер енгізу бойынша өткізілген рес­публикалық референдумда да Сыр жұртшылығы ауызбіршіліктің үлгі­сін­ көрсетіп, Қызылорда облысы үздік өңір­лер қатарынан көрінген болатын. Бұның барлығы да аймақ тұрғында­ры­ның Мемлекет басшысына деген сені­мі, стратегиялық реформаларын қол­дауының нәтижесі, – деді Н.Нәлібаев.

Облыс әкімі сындарлы кезеңде аза­маттық белсенділігі және ұйымдас­ты­рушылық қабілетімен көзге түскен азаматтарды Қазақстан Президентінің арнайы «Алғыс хатымен» марапаттады.

Сондай-ақ аймақ басшысы Прези­дент бастамасымен қолға алынған қо­ғамда экологиялық құндылықтарды ор­нықтыруға үндейтін «Birge: Taza Qa­zaq­stan» акциясын жоғары деңгейде өт­кізуге атсалысқан сырбойылықтарға алғыс білдірді және алдағы уақытта да тазалық іс-ша­ра­ларына белсене қа­тысуға шақырды.

Күннің ыстығы мен желдің өтінде тынбай еңбек етіп жүрген қарапайым еңбек азаматтарына «Көкшетау», «Мерке», «Сарыағаш» және «Жаңақорған» емдік-сауықтыру шипажайларына 30 жол­дама табысталды. Одан бөлек, акция нәтижесімен үздік атанған 7 ауыл­дық округке су сорғысы берілді.

– Келесі жылдан бастап конкурс ар­қылы «Үздік аудан орталығы», «Үздік ауыл» және қала ішіндегі «Үздік мөлтек аудан» анықталып, жеңімпаздарды қоғам­дық ұйым өкілдері, экобелсенділер мен еріктілерден құралған тәуелсіз комис­сия таңдайтын болады. «Үздік аудан орталығы» номинациясы бойынша І орынға арнайы жол тазалағыш КАМАЗ және қалдық тасымалдаушы МАЗ автокөлігі, ассенизатор мен кран-мани­пулятор берілсе, ІІ орынға қалдық тасымалдаушы көлік, ассенизатор және жол тазалаушы трактор, ал ІІІ орынға ассенизатор мен жол тазалаушы трактор сыйға берілмек. «Үздік ауыл» номинациясын иеленген үш ауылға да бағалы сыйлықтар табысталады. І орын алған ауылға жер қазатын трактор мен самосвал ЗИЛ автокөлігі, ІІ орынға жер қазатын трактор мен тіркеме, ал ІІІ орынға жер қазатын трактор беріледі. «Үздік мөлтек аудан» номинациясы бойынша І орынға сквер, спорттық алаң­мен жарықтандыру жұмыстарын жүр­гізіледі. ІІ орынға абаттандыру мен спорттық ойын алаңын салса, ІІІ орынға абаттандыру жобалары сыйға берілмек. Келесі жылы елді мекен­­дерде тазалық, көркейту және абаттан­дыру жұмыстарымен айналысатын арнайы мемлекеттік коммуналдық кәсіпорын­дарды құрып, оларға облыс­тық бюджет­тен материалдық-техни­ка­лық базасын нығайтуға қажетті техникалар сатып алынады, – деді облыс әкімі.

Айтулы іс-шарада сырдариялықтар да марапат биігінен көрінді. ҚР Прези­дентінің «Алғыс хатымен» аудан әкімі Мұрат Ергешбаев пен аудандық білім бөлімінің басшысы Берік Жәнібеков марапатталды. Ал «Birge: Taza Qazaqstan» акциясын жоғары деңгейде өткізуге ат­салысқаны үшін тереңөзектік зейнеткер, қоғамдық тазалық жұмыстарының белсендісі Роза Рақымбаева мен кент әкімі аппаратының қоғамдық жұмыс­шысы Гүлжазира Едренова «Сары­ағаш» шипажайына, аудандық орман және жануарлар дүниесін қорғау мекемесінің орман шебері Кенжебек Мұстафаев «Жаңақорған» шипажайына демалуға жолдама алды. Қазақстан Республикасы Экология, геология және табиғи ресурстар министрінің «Алғыс хаты» Тереңөзек кенті әкімі аппаратының қызметкері Алмас Ибрагимұлына бе­ріл­ді. Сонымен қатар Қоғалыкөл ауы­лының әкімі Б.Рахымбеков пен Шіркейлі ауылының әкімі Т.Құламқадіровке жыл бойы тазалық жұмыстарын жақсы ұйым­дастырғаны үшін ауыл игілігіне қолдану мақсатында су насосы табысталды. Осылайша, облыс орталығында өткен салтанатты іс-шарада сырдариялықтардың мерейі үстем болып, марапат төрінен кө­рінді.

А.ҚҰРМАНАЙТЕГІ
03 желтоқсан 2022 ж. 374 0