Аудан орталығы абаттандырылуда

Соңғы жылдардың көлемінде аудан орталығын абаттан­дыруға ерекше көңіл бөлінуде. Тереңөзек кентіне кіреберістен бастап оның тазалығына мән берумен қатар, бағдаршам орнату, ойын алаңдарын салу, басты көшені жөндеу, аяқ жол салу, көше жарығын заманауи талаптарға сай ету жұмыстары қарқын алған. Бұл орайда тереңөзектіктердің талап-тілегі назардан тыс қалған емес.

Осыдан біршама уақыт бұрын А.Алиак­баров көшесіндегі көпқабатты тұрғын үй тұрғындары сол маңды абаттандыру туралы өтініштерін білдірген. Тұрғындармен аудан әкімі М.Ергешбаев арнайы кездесіп, абат­тандыру жұмыстары қолға алынатынын тілге тиек етті. Жоба дайындау, мердігер мекемені анықтау секілді тиісті кезеңдерден кейін көше бойында құрылыс жұмыстары бас­талды.

– Тереңөзек кентіндегі тұрғын үй аула­ларын абаттандыру аудан басшысының қол­дауымен жүзеге асуда. Тұрғын үй аулалары заманауи талаптарға сай жаңғыратын болады. Бұл жұмыстар қазан айының екінші онкүндігінде бастау алып отыр. Негізгі іске асыру мерзімі 3 айды қамтиды. Құрылыс жұмыстарын «Асанас-Дар» ЖШС атқаруда. Жобаның жалпы құны – 111 472,0 мың теңге. Абаттандыру жұмыстары толық аяқ­тал­ғанда кент тұрғындарына қолайлы жағ­дай болмақ, – дейді аудандық тұрғын үй-ком­муналдық шаруашылық, жолаушылар көлігі және автомобиль жолдары бөлімінің бас­шысы Жеңісбек Файзуллаев.

Жақын күндері құрылыс жұмыстарының басталғанына көпқабатты тұрғын үйлердің тұрғындары қуаныштарын білдіруде. Алдағы уақытта бұл маңда автотұрақтар, балаларға арналған ойын алаңдары пайда болады.

Аудан орталығында көшені жөндеу жұ­мыстары биыл да жалғасын табуда. Өткен жыл еншісінде кенттегі басты көше – А.Иманов көшесі күрделі жөндеуден өтсе, биыл басты көшелердің бірі – И.Тоқтыбаев көшесі де орташа жөндеуден өткізілуде. Атап айтқанда, ұзын көшенің қос қапталына тротуар салу жұмыстары жүргізіліп жатыр.

Орташа жөндеу жұмыстарын «Компания Бауыржан құрылыс» ЖШС жүргізуде. Жоба бойынша көше бойына тротуар төсеу, бетонды лоток орналастыру қарастырылған. Қазіргі таңда мердігер мекеме тарапынан бордюр орнатып, тас төсеу жұмыстары жүргізіліп жатыр. Негізінен, құ­рылыс жұмыс­тары қыркүйек айында бас­тал­ған болатын.

– Көшенің бойына тротуар салынып жат­қаны қуантады. Өйткені, бұл көшенің бойымен күнделікті көлік ағылып жатады. Кейде көпшіліктің тротуардың болмағандығынан жолдың ортасымен жүріп бара жатқанын байқайсың. Оның адам өміріне қауіпті екені белгілі. Ал енді жолдың екі жақ бетіне де жаяу жүргінші жолы салынып жатыр. Мұның кент тұрғындарына өте қолайлы болатыны анық. Сондықтан сапалы және уақытылы аяқталғанын күтіп жүрміз, – дейді көше тұрғыны Б.Иманғалиев.

Аудан орталығын абаттандыру жұмыс­тарының нәтижесінде кент келбеті көркейіп келеді. Алдағы жылдардың еншісінде де ауқымды жобалар жүзеге аспақ. Оның та­лант­тардың өлкесі саналатын кент көркін ай­шықтайтыны айқын.

Е.БЕРКІНБАЕВ