Сырдария – үздік аудан
Сүйінші, ағайын! Биыл Сырдария ауданы агроөнеркәсіп кешенін дамытуда ең жоғарғы көрсеткіштерге қол жеткізген «Үздік аудан» атанды. Мерейлі марапатты облыс әкімі Нұрлыбек Нәлібаев қала орталығындағы салтанатты жиында аудан әкімі Мұрат Ергешбаевқа табыстады. Бұл жетістік – бірлесе еңбек еткен аудан халқының ынтымақ-бірлігінің, қажырлы еңбегі мен маңдай терінің жемісі. Сондықтан Сырдария ауданының үздіктер көшін бастауы – аудан халқына ортақ қуаныш.Астықты өлкедегі Сыр елінің еңбексүйгіш шаруалары биыл су тапшылығының қиындықтарына қарамастан мол өнім алды. Облыс диқандары 188 500 гектар жерге егін егіп, оның ішінде негізгі дақыл күріштің әр гектарынан 56,7 центнерден өнімге қол жеткізді. Соған сәйкес аймақта егін жинау науқаны қорытындыланып, «Алтын дән» салтанатты іс-шарасы өткізілді. Облыс әкімі Нұрлыбек Нәлібаев дала еңбеккерлерін марапаттап, құрмет көрсетті. Сыр өңірінің қамбасын молайтып, ала жаздай еңбек еткен шаруалардың адал еңбегін аймақ басшысы жоғары бағалады.
– Біздің облыс еліміздің күрішке деген қажеттілігінің 90 пайызын өтеп келеді. Жыл сайын экспортқа 100 мың тонна көлемінде күріш шығарылуда. Мемлекет басшысының қолдауымен Сырдария өзенінің жоғары ағысында орналасқан мемлекеттер арасындағы келіссөздер нәтижесінде су көлемі былтырғы деңгейден көбейді. Бұл ретте диқан қауымның ұсыныс-тілектерін ескере келе, Президентіміздің пәрменімен күріш егісі көлемін 78 600 гектар көлемінде қалдырдық. Ыбырай Жақаев «егініне қарап – қырманы, күтіміне қарап – түсімі» деген. Күрделі жағдайға қарамастан күріштің әр гектарынан 70 центнерден аса өнім алған «Ақтөбе және к», «Жаңажол», «Абзал және К», «Мағжан және К», «Ақжарма және К», «Ақжарма – 1» жауапкершілігі шектеулі серіктестіктерін ерекше атап өтуге болады. Сондай-ақ, күріштің әр гектарынан 90-100 центнерден өнім алған күрішші-звеноводтарымызды мақтан тұтамыз. Қамбамыз дәнге, қорамыз малға толып, халқымыздың құт-берекесі арта берсін, – деді облыс әкімі.
Айта кету керек, Сыр диқандары биылғы жылы күріш егуді жылдағыдан ерте, яғни 15 сәуірде бастап, жауапты кезеңді 10 қазанға дейін толық аяқтады. Өңірде суды үнемдеу мақсатында Қазалы ауданында жаңбырлатып суару тәсілімен 87 гектар жерге жүгері егілсе, алғаш рет түрік компаниясымен бірлескен құны 13,8 млрд теңге болатын қызанақ пастасын өндіретін зауыт салынады. Өндіріс жылына 24 мың тонна қызанақ пастасын шығарады. Тағы бір атап өтерлігі, биыл аймақта бақша өнімдерін егуге басымдық берілді. Облыс әкімінің тапсырмасы аясында ірі шаруашылықтар егіс егуге ынталы ауыл халқына 10-15 гектардан жер дайындап, 6802 отбасы 1833 гектарға өнім еккен.
Салтанатты іс-шарада ауыл шаруашылығы саласына елеулі үлес қосқан қос қайраткер Жарылқасын Шәрiпов пен Имамзада Шағыртаевқа «Қызылорда облысының Құрметтi азаматы» атағы табысталды. Сондай-ақ «Алтын дән» іс-шарасында бірқатар сала қызметкері облыс әкімінің «Құрмет» грамотасы, ҚР Ауыл шаруашылығы министрлігінің «Еңбек ардагері» медалі мен «Ауыл шаруашылығы саласының үздігі» төсбелгісімен марапатталды. Ал жыл қорытындысымен топ жарған озаттар түрлі номинация иеленді.
Салтанатты іс-шарада облыс әкімі «Мағжан және К» ЖШС үздік қызметкерлеріне «Lada Vesta» жеңіл автокөлігін сыйға тартса, «Жаңажол», «Ақжарма және К» қожалықтарына «Lada Granta» тұлпарын табыстады. Ал «Таң ЛТД» ЖШС мен «Ақжар» шаруа қожалығы озат жұмысшылары «Chevrolet» автокөлігін мінді.Аудандар арасында «Агроөнеркәсіп кешенін дамытуда ең жоғарғы көрсеткіштерге қол жеткізген үздік аудан» атағы Сырдария ауданына бұйырды. Марапат аудан басшысына табысталып, сырдариялықтардың абыройы асқақтады. Ал «Ауыл шаруашылығы өнімдерін өңдеу саласы» номинациясы бойынша Қазалы ауданы марапатталса, «Мал шаруашылығы» саласында Арал ауданы үздіктер қатарына енді. Сондай-ақ «Егін шаруашылығы» номинациясында Шиелі ауданы жеңімпаз атанды.
Құрмет төрінен орын алған еңбеккерлер арасында озат шопан, бақша өсіруші, күріш өсіруші, комбайншы, агроном, бригадир арнайы алғысқа кенелді. Мерекелік кеш концерттік бағдарламаға ұласты. Сыр елінің сахна жұлдыздары дала еңбеккерлерінің құрметіне әуезді ән айтып, мерекені думанға бөледі.
Қызылорда облысы әкімінің баспасөз қызметінің хабарлауынша, 15 қазан күні диқандар жиған өнімдерін тоқшылық мерекесі жәрмеңкеге апарады. Сырбойылықтар 1000 тонна өнімді базар бағамынан 15-20 пайыз төмен бағада ала алады.
Ақтөре ИБРАГИМҰЛЫ
