Тіршілік тынысы Tirshilik-tynysy.kz ақпараттық агенттігі
» » Ұстаздар марапат төрінде

Ұстаздар марапат төрінде

Аудан әкімдігінде ау­дандық білім қыз­мет­керлерінің пе­да­го­ги­ка­лық тамыз ке­ңесі өтті. Аудан ұстаз­дары алдымен облыс әкімі Нұрлыбек Нәлібаевтың қаты­суымен өткен облыс­тық тамыз кеңесін онлайн форматта тамашалады.

Ұстаздар басқосуына аудан әкімі Мұрат Ергешбаев, аудандық мәслихат хатшысы Ержан Әжікенов, аудандық ұстаздар кеңесінің төрайымы Күлбарам Әбілова және бі­лім саласының қыз­меткерлері қатыс­ты.

– Сіздерді алдымен жаңа 2022-2023 оқу жылының басталуымен шын жүректен құттықтаймын, – деген аудан әкімі Мемлекет басшысы Қасым-Жомарт Кемелұлы Тоқаевтың Жаңа Қазақстанды құру идеясын іске асыру міндеттеріндегі білім беру жүйесінің маңызын атап өтті.

– Биылғы конференция Мемлекет басшысының арнайы шешімімен «Балалар жылы» аясында өтуімен ерек­шеленеді. Баланың дамуы жә­не оның мүдделері – басты құнды­лы­ғымыз. Сондықтан да мемлекет жас ұрпаққа сапалы білім, саналы тәрбие беру ісі­не ерекше назар аударып отыр. Бұл міндеттерді атқаруда әрбір адамның азамат болып қалыптасуына маңызды рөл атқаратын ұстаздардың еңбегі ерекше екенін атап өткім келеді. Жаңа Қазақстанды құру – ең алдымен білімге құштар, еңбекке адал, қоғамға жа­уапты азаматтарды қалыптастыру, осы арқылы қоғамдық құндылықтарды жа­ңарту. Жаңа Қазақстанның азаматтарын қалыптастыру балабақша, мектеп қабырғасынан басталуы тиіс.Сіздердің қажырлы еңбектеріңіз бен білім-біліктеріңіз, тәжірибелеріңіздің арқа­сын­да өткен оқу жылы ауданның білім саласы үшін табысты болды деп айту­ға толық негіз бар. Жүзге жуық оқушы об­лыстық, республикалық деңгейдегі түрлі бағыттағы байқауларда жеңім­паз атанды. Ұлттық бірыңғай тестілеу қорытындысымен аудан бірінші орын иеленіп, талапкерлердің 91 пайызы мемлекеттік грант иегері болып, өздері қалаған мамандық бойынша еліміздің оқу орындарында жоғары білім ала бас­тайды. Мұның бәрі – білімді шәкірт тәрбиелеп жүрген ұлағатты ұстаздардың тынымсыз еңбегінің жемісі. Алдағы жаңа оқу жылы да баршаңызға табысты болып, білім шыңын бағындыра беріңіздер, – деді аудан басшысы.

Одан кейін ауданның білім сала­сының өркендеуіне үлес қосып, шәкірт тәрбиелеу жолында ерен еңбек­тің үлгісін көрсетіп жүрген ау­дан мұға­лімдері марапатталды. Ұлағатты ұстаз­дар Зәуре Аманшеитова, Анар Арыс­танбаева, Марина Оспан, Гүлсара Дүйсенова, Райкүл Айкөпешова ҚР Оқу-ағарту министрінің «Алғыс хатымен», Асылзат Тұрсынбаева облыс әкімінің «Алғыс хатымен», Бақытжан Абылбеков, Марина Жансейтова, Рзахия Мұхан, Гүлнұр Тлеубергенова, Арай Қойшығұлова, Мирамкүл Абекова облыстық білім басқармасының «Құрмет грамотасымен», Нұрхан Кү­дербаева, Махаббат Айтбаева, Айзат Оразбай, Гүлжан Досбаева, Олжас Құлабаев аудан әкімінің «Алғыс хатымен» марапатталды. Марапаттарды аудан басшысы Мұрат Нәлхожаұлы табыстап, Тәуелсіз елдің жарқын бо­лашағын бәсекеге қабілетті, білімді етіп дайындау жолында аянбай тер төгіп жүрген ұстаздарға жаңа оқу жы­лының табыс­ты болуын тіледі.


Аружан МҰХАНБЕТҚАЛИ
30 тамыз 2022 ж. 494 0