Білімділер бәсекесі
Жақында Нағи Ілиясов ауылында «Сыр үміті» жастар қауымдастығы мен Қорқыт ата атындағы Қызылорда универститінің ұйымдастыруымен аудан жастары арасында «Aqyl Battle» интеллектуалды сайыс өткізілді.Интеллектуалды сайыстың ашылуында сөз алған «Сыр үміті» қауымдастығының төрағасы Мағжан Ералиев сайыс қатысушыларына сәттілік тіледі.
– Құрметті достар, бүгінгі сайысқа қатысушылар сайыс жеңімпазы болуларыңызға сәттілік тілейміз. Зейінді жастардың бәсекесінде тек білімділер топ жаратынына сенеміз. Әрдайым ізденіс пен білім деңгейін жетілдіру – саналы жастардың міндеті. Алдағы уақытта мұндай іс-шаралар көптеп ұйымдастырылады, – деді қауымдастық төрағасы М.Ералиев.
Негізінен, сайыста аудан бойынша 23 команда бақ сынады. Білімді жастар интеллектуалды, логикалық, танымдық сұрақтарға жауап берді. 4 қатысушыдан құралған команда өзара жеңімпазды анықтады.
Сайыс қорытындысында Шаған ауылынан келген «Smart team» командасы жеңімпаз атанды. Жүлделі ІІ орынды Ақжарма ауылынан келген «Зияткер» командасы, ІІІ орынды А.Тоқмағамбетов ауылынан келген «Асқар жастары» командасы иеленді. Өз кезегінде «Сыр үміті» жастар қауымдастығының төрағасы сайыс жүлдегерлеріне қаржылай сыйлық табыстады.
Балтабай ОРДАБЕКОВ
