Ақынға құрмет
М.Сақтаповтың туған күніне орай аудандық газет редакциясы жанындағы бастауыш ардагерлер ұйымының төрағасы, Қазақстан Журналистер Одағының мүшесі Мүсілім Қалмұратұлы әріптестерінің атынан мерейтой иесін құттықтап, иығына шапан жауып, құрмет көрсетті.– Ақынға құрмет көрсету – азаматтық міндетіміз. М.Сақтапов аудандық газетте ұзақ жылдар еңбек етіп, ауданның рухани-мәдени дамуына айрықша үлес қосты. Ақынның тарихи-танымдық шығармалары мен аудан тұрғындары сүйіп оқитын жалынды жырлары – біздің рухани байлығымыз. Редакция ардагерлерінің және әріптестеріміздің атынан ақын ағамызға зор денсаулық тілеймін. Сізді тоқсанның төрінен, жүз жастың тұғырынан көрейік, – деді М.Қалмұратұлы.
Құрмет көрсету іс-шарасында аудандық газеттің бас редакторы А.Ибрагимұлы ізгі ниетін жеткізіп, тілектестігін білдірді. Ақынның өлеңдерін оқып, ардагердің өнегелі өмір жолы жас ұрпақ үшін үлгі-өнеге екенін атап өтті.
Өз кезегінде ақын, «Сырдария ауданының Құрметті азаматы» Мұхтар Сақтапов құрмет көрсетіп, ақ тілегін арнаған әріптестеріне алғыс айтып, ақ батасын берді.
Атап өтейік, ақын 2020 жылы аудандық газет редакциясының ұсынысымен Қазақстанның Құрметті журналисі атанса, былтыр Ел Президентінің Жарлығымен «ҚР Тәуелсіздігінің 30 жылдығы» мерекелік медалімен марапатталды. Өткен жылы аудандық кітапхананың «Өлке болып оқимыз жобасы» аясында М.Сақтаповтың өмірі мен шығармашылығы жыл бойы насихатталды.
А.СЕЙІЛОВ
