Бесарықтағы бөбекжай
Бала тәрбиесінде ата-анадан кейінгі маңызды рөлді балабақша атқарады. Сондықтан биылғы балалар жылына орай аудандық басылымда «Балабақша – бақыт мекені» айдарын ашып, жыл көлемінде аудандағы балабақшалардың бүлдіршіндерге тәлімді тәрбие беру бағытындағы жұмыстарын ақпараттандыруды қолға алдық. Бүгінгі санда Бесарықтағы «Бөбек» бөбекжай балабақшасына тоқталмақпыз.2007 жылы заманауи үлгіде салынған бөбекжай балабақшасында бүгінде 5 топта 120 бүлдіршін тәрбиеленуде. Олар үшін мектепке дейінгі білім беру мекемесінде ойнайтын, тамақтанатын және жатын бөлмелері, гигиеналық орындары жеке-жеке орналасқан, әрі кең, әрі жарық. Техникалық базасы толығымен жарақтандырылған.
Енді ғана айналасын танып, жас жауқазындай жетіліп келе жатқан бүлдіршіннің көңіл-күйін, жүріс-тұрысын, тамақтануын, мектепке дейінгі біліммен қамтуын қамтамасыз етуде балабақша тәрбиешілерінің еңбегі зор. Балдырғандар үшін тәрбиешілердің айтқаны жазылмаған заңмен тең. Бүгінде мұнда 34 қызметкер жұмыс істейді. Тәжірибелі, білімді мамандар бала тұлғасын қалыптастыруда тынымсыз ізденіспен еңбек етуде.
– Жас ұрпақтың сапалы білім алып, болашақ өмірге дағдылануы біз үшін маңызды. Сондықтан балабақшаның оқу-тәрбие жұмысы мемлекеттік жалпыға міндетті білім беру стандартын, мектепке дейінгі тәрбие мен оқытудың үлгілік оқу бағдарламасын басшылыққа алып, оқу тәрбие процестері өз дәрежесінде ұйымдастырылып келеді. Сол негізде балғындардың жас ерекшеліктері мен мүмкіндіктері ескеріле отырып, тәрбиелік-танымдық сабақтар берілуде. Бұл ретте балабақша тәрбиешілерінің еңбегін атап өткен жөн. Балалардың ой-өрісін дамытуда күнделікті түрлі іс-шаралар мен бағдарламаларды ұйымдастыруда олар өте белсенді. Әрі ата-аналармен де бірігіп жұмыс жасауға әбден дағдыланған, – дейді балабақша меңгерушісі Гүлжазира Досболова.
Балабақша бүлдіршіндерінің болашағын қалыптастыру үшін де мамандардың үнемі ізденіс үстінде болғаны дұрыс. Меңгерушінің айтуынша, тәжірибе алмасу мақсатында аудандағы өзге де балабақша тәрбиешілерімен түрлі тақырыпта дөңгелек үстелдер мен семинарлар жиі өткізіліп тұрады екен. Бұған дейін білім мекемесінде «Мектепке дейінгі білім берудегі мемлекеттік-жекеменшік әріптестік», «Қазақстандық білім беруде мектепке дейінгі мемлекеттік жекеменшік серіктестікті дамытудың бүгінгі проблемалары мен болашағы», «Білім-тәрбие жұмыстары бала денсаулығының жаңаша негіздері», «Мектепке дейінгі ұйымдарда тәрбиелеу мен білім беру үрдісінде балалардың интеллектуалдық қабілеті мен ой-өрісін дамыту барысында ұйымдастырылған оқу қызметтерінде инновациялық технологиялық тәсілдерін қолдану тиімділігі», «Инновациялық технологияны қолдану, балалардың интеллектуалдық ойлауын дамыту», «Мектеп жасына дейінгі балалардың эстетикалық талғамын қалыптастыру» тақырыптарында республикалық, облыстық, аудандық және аймақтық семинарлар өткізіліп, тәжірибе шыңдаған. Әркез жаңашылдыққа бейім ұжым тәрбиешілері мен бүлдіршіндері «Media Bilim» республикалық «Өрлеу» педагогикалық шеберлікті дамыту орталығының, «Кемел» өнер-білім орталығының, «Білім нұры» ұлттық қолөнер орталығының, «ZIAT» ғылыми-әдістемелік орталығының байқауларына қатысып, арнайы марапатталған. Ал өткен жылы Бесарық ауылдық мәдениет үйінің ұйымдастыруымен өткен мекемеаралық сайыста балабақша ұжымы «Үздік ұжым» номинациясын жеңіп алған.
Кез келген жас ағашты қалай исең, солай өседі. Осыны білетін бөбекжай балабақшасының ұжымы балдырғандарға білімнің бастапқы негізін беруде барын салуда. Оларға ата-ананың айтар алғысы мол.
Ердос БЕРКІНБАЕВ
