Балабақшадағы қос мереке

Балаларға патриоттық тәрбие беру мақ­сатында №2 «Балдәурен» бөбекжай балабақ­шасында тәрбиеші Әсел Төлеге­нованың ұйымдастыруымен «Бала сұлтаны – 2021» атты ертеңгілік сайыс өткізілді. Сайысқа «Қарлығаш» ересек тобының тәрбиеленушілері қатысты. Мереке өткізілген бөлме жалаушалармен және шарлармен әсем безендірілген. Балалардың өнерін тамашалап, қазылық етуге халықаралық «Қазақ тілі қоғамы» қоғамдық бірлестігі Сырдария аудандық филиалының төрағасы Шаһарбек Нұрсейітов, балабақша меңгерушісі Ақанай Шоқанова қатысып, балаларға ізгі тілектерін білдірді.

Өнерлі балалар музыка сүйемелдеуімен жеке әндер, тақпақтар айтты. Зеректігімен көзге түсіп, топтан озған Заңғар Жеңісбек «Бала сұлтаны – 2021» номинациясын иеленді. Ал, Әлшер Асқарбек «Ақылды жігіт», Нұрдәулет Келес «Келбетті жігіт», Мәди Серікбол «Өнерлі жігіт», Нұрәлі Мақсұтұлы «Алғыр жігіт», Бекдәулет Балтас «Шымыр жігіт» номинацияларына ие болды.

Ертеңгілік соңында балалар аудан орталығындағы Мәңгілік алау ескерткішіне барып, гүл шоқтарын қойып, тағзым етті. Қос мерекеге арналған ертеңгілік жоғары дәрежеде өтті

.

«Жақсының жақсылығын айт, нұры тасысын» дейді халық даналығы. Сол айтқандай, тереңөзектік жеке кәсіпкер Дархан Шағыров балабақшаны жөндеуіне 200 мың теңге қаржы бөліпті. «Бар жақсымыз – балаларға» деп ұғынатын мың болғыр азаматқа балабақша ұжымы дән риза. Кәсіпкердің демеушілігі өзгелерге үлгі болсын дейміз.

Бибісара ТАҢАТАРҚЫЗЫ