Тіршілік тынысы Сырдария аудандық қоғамдық-саяси газет
» » Ғұмыры өлеңмен өрілген

Ғұмыры өлеңмен өрілген

Ақын, Қазақстанның Құрметті журналисі, «Сырдария ауданының Құрметті азаматы» Мұхтар Сақтапов­тың есімі Сыр жұртына жақсы таныс. Ақын ағаның сыршыл өлеңдері алғаш рет аудандық баспасөз бетінде жарияланып, талантты азаматты туған жері бозбала шағынан таныды. Мерейлі 85 жасқа келген қаламгердің өнегелі өмір жолы мен шығармашылығын дәріптеу мақсатында жазба ақындардың мүшәйрасы аудандық Мәдениет үйінде өтіп, оған 16 талапкер қатысты.

Аудандық газеттің ұйытқы болуымен Сақ­таповтар әулетінің идеясына сәйкес, аудан­дық мәдениет және тілдерді дамыту бөлімі ұйымдастырған мүшәйра туралы алдын ала хабарланған талапкерлер ережеге сай екі өлең­нен оқыды. Қара өлеңнен маржан терген сөз зергерлеріне ақын ағаның қос шәкірті – Бағдат Есназар мен Ақтөре Ибрагимұлы және аудандық мәдениет үйінің мәдени ұйымдастырушысы Әбдірайым Тоқаяқов қазы­лық етті.

Мүшәйраға қатысушыларды құттықтап ал­ғысөз сөйлеген аудандық мәдениет жә­не тілдерді дамыту бөлімінің басшысы Жеңісбек Төрәлиев:

– Ауданның бас ақыны атанған Мұх­тар Жаңалханұлының өмірі мен шығарма­шы­лығына арналған мүшәйраға жырсүйер қауым қатысып отыр. Өнегеге толы ақын өмірі өлеңмен өрнектеліп келеді. Тума талант үздіксіз 40 жыл бойы аудандық газетте қызмет етті. Оның қаламынан туындаған сан түрлі тақырыптағы мақалалары мен өлең­дері, сықақтары мен фельетондары оқыр­ман жүрегіне жол тапты. Ақиық ақын Асқар Тоқмағамбетовтен бата алған ақын­ды Сырдан шыққан танымал ақындар ұстаз етті. Ауданның бас ақыны бүгінде 85 жастың төрінде, ұрпақ­тарының ортасында отыр. Жырдан шашу шашамын деп талаптанып, өлеңді қадір тұтқан жазба ақындарға сәттілік тілеймін. Оза ша­уып бәйге алып, қуаныштарыңыз еселей түссін, – деді.

Сахна төріне кезек-кезекпен көтеріліп, өлең оқыған талапкерлер алдымен ақын ағаға арнаған арнауларын оқыса, екінші өлеңнің тақырыбы ауданға арналды.

Қатысушы 16 талапкердің арасында талай бәйгеден оза шапқан шын жүйріктер мен енді ғана жыр өлкесіне қанаттанған жас ақындар да болды. Ауданның Іңкәрдария, Қоғалыкөл, Шаған, Шіркейлі, С.Сейфуллин, Жетікөл ауы­лы мен Тереңөзек кентінен қатысқан талапкерлер ақын Мұхтар Сақ­та­повтың талантын, шынайы болмысын, шы­ғар­машылығын өлеңдеріне ар­қау етті.

Туған жері Тереңөзекті шын сүйген дара ақын – Мұхтар аға Сақтапов. Ақынның «Те­реңөзек» атты өлеңі жерлестерінің мақта­нышы айналып, кеудеге қуаныш сезімін сыйлады. Жергілікті халықтың гимніне айналған өлеңге ақынның баласы Махмұт Мұхтарұлы әсем саз жазды. Әншілердің бағын ашқан, талай байқаулардың жүлдесін алған көркем ән «Сырдария» квартетінің репертуарына енді.

Мүшәйрада сөз алған ақын Бағдат Есназар ақын ұстазының Тереңөзек туралы жазған өлеңін оқып, ақынның мәртебесін биіктетті.

– Мұхтар ағаның өлеңдері өмірінің өзегі­не айналды. Ақынжандылардың асқар тауы болған, дарынды азаматқа бас имейтін жан кемде-кем. Әсіресе, өлең сөздің қадірін бі­летіндер үшін орны бөлек ақын ағаға күн сайын сәлем беруге асығып тұрамыз. Оның ба­тасын алуға тырысамыз. Атақты Иран-Ғайып ақын ағаны ұстаз тұтты, сырлас­ты. Ақындық жол – қиын жол. Сол қиын жолда өнегелі өмір сүрген ақын ағаның шыққан биігі, алған мәртебесі – біздер үшін үлгі-өнеге. Мінезі жібектей жұмсақ тұлға мейірімге толы жүрегімен туған жерді аялауға, құрметтеуге үйретті. Жақ­сылыққа балаша қуанатын ақын аға ауданның мәдени, рухани дамуына қырық жыл атсалысты. Мұх­тар ағаның ғұмыры ұзақ болсын, талантты ақын­дарға батасын беріп орта­мызда жүре берсін, – деген қазылар алқасының мүшесі Бағдат Есназар 10 талапкерге «Алғыс хат» тапсырды.

Қазылар алқасының мүшесі Әбдірайым То­қаяқов мүшәйраның үшінші орын жүлдегер­лері атанған Ақтолқын Абылаева мен Әйгерім Советке диплом мен қаржылай сыйақысын тапсырды.

Жүлдегерлерді марапаттау салтанатында сөз кезе­гі қазылар алқасының төрағасы Ақтөре Ибра­­гимұлына беріліп, мүшәйраның екінші орын иегерлері марапатталды. Марапат иелері Гауһар Айғалиева мен Қанат Көзейбайға арна­йы дип­лом мен қаржылай жүлде тапсырылды.

– Бүгін біз идеологиялық тұрғыдан маңыз­ды, тағылымы мол әдеби іс-шарада бас қо­сып отырмыз. Ауданның бас ақыны Мұхтар Жаңалханұлы Сақтапов атамыздың құрметіне арналған іс-шараның үлкенге де, кішіге де берері мол деп есептеймін. Негізінен, іс-ша­раның ұйымдастырушысы біз болғанымен, ұйытқысы, идея авторлары һәм қолдаушысы – ақынның ұрпақтары. Сондықтан шын жүре­гіммен ақынның ұрпақтарына алғыс айтып, ри­зашылығымды білдіремін. Мұхтар ата біздің ауданның ғана емес, айдынды Арал мен қарт Қаратау аралығын қоныстанған Сыр өңірінің ортақ ақыны. Мұны біздің аға буын өкілдері де айтып, жазып кеткен. Мысалы, Иран-Ғайып, Қайырбек Асанов, Жадыра Дәрібаева, арамызда жүрген Бағдат Есназар – ақынның ізбасарлары, төл шәкірттері, өлеңінің де, өнерінің де жалғас­тырушылары. Мен осы қатарға бүгінгі мүшәй­раға қатысқан талапкерлерді де қосқан жөн деп есептеймін, – деді Ақтөре Ибрагимұлы.

Сонан соң «Nur Otan» партиясы облыстық филиал кеңесшісі, ақын ағаның немересі Әсет Мұхтаров мүшайраның бірінші орын иегері Мұхамеджан Мансұровқа жүлдесін тапсырып, іс-шараны ұйымдастырушыларға риясыз алғысын білдірді.

Мүшайраның бас жүлдесін Іңкәрдария ауы­лын­дағы №191 орта мектептің мұғалімі Марал Сағындықова жеңіп алды. Жүлдені аудандық мәдениет және тілдерді дамыту бөлімінің басшысы Жеңіс Төрәлиев тапсырды. Ақынжанды ұстаз Марал Сағындықова мүшәйрада «Аға­мызға ақ тілек» және «Тереңөзек – терең өзегім» атты өлеңдерін оқыды.

– Бүгін шын мәнінде аға ұрпақты ұлықта­ған керемет іс-шараны көріп, тамашаладық. Әке­­міз Мұхтар Сақтаповтың ауданға сіңір­ген еңбегі, оның шығармашылығы жан-жақ­­ты ақындардың өлеңдерімен жыр жол­да­рына жазылды. Жыр мүшәйра­сын ұйым­­­­­­­дастырушыларға отбасымыздың атынан ай­тар алғысымыз шексіз. Әсіресе, әкеміздің шәкірт­тері осы кештің жоғары деңгейде өтуіне атсалысты. Сексеннің сеңгірінен асқан әкемізді құрметтеп, қадірлеген ел-жұртқа үлкен ризашылықпен басымызды иеміз, – деді ақын ағаның қызы, №210 О.Әбілпаттаев атындағы орта мектептің директоры Света Сақтапова.

Айту керек, ауданның бас ақыны Мұхтар Сақтаповтың шығармашылығын дәріптеуге ар­налған іс-шара аудандық кітапханада «Өлке болып оқимыз» жобасы негізінде жыл бойы өтіп, қорытындыланған болатын. Жалпы ақынды құрметтеу, қадірлеу тоқтап қал­мақ емес. Ақынның ұлағатты ұрпақтары, ойлы оқырмандары, ардақтайтын шәкірттері бар кезде алдағы уақытта да осы тектес іс-шаралар өтетін болады.

Бибісара ЖАНӘЛІ 
25 желтоқсан 2021 ж. 120 0
  • Акимата Кызылординской области
  • Сайт президента
  • Нұрлы жол
  • Рухани Жаңғыру
  • Жаңғыру 30
  • Egov
  • Digital Kazakhstan
  • Нақты қадам