Еңбек еленді, құрметке бөленді

Ала жаздай танапта тынымсыз тіршілік еткен шағандық еңбек­кер­лер ел егемендігінің 30 жылдығында «Алтын-дән» мерекесін атап өтіп, қос тойды қатар тойлады. Ауылдағы мәдениет үйінде «Ша­ған Жер» ЖШС жылды қорытындылап, межелі асуды бағындыруға атсалысқан серіктестік қызметкерлері марапатталды.

Биыл үшінші жылда серіктестікті басқарып, шаруашылық жұмысын әртараптандыруға ден қойған басшы Ж.Сыздықов еңбек­кер­лерді мерекемен құттықтады.

– Ең алдымен, Сіздерді Тәуелсіздіктің 30 жылдығы мерекесімен шын жүректен құт­тықтаймын! Тұғырлы Тәуелсіздігіміздің арқа­сында бейбіт елде еселі еңбек етіп келеміз. Қасиетті Шаған ауылында «Социалистік Ең­бек Ері» Цой Ги Хва, «Еңбек Қызыл Ту» ор­денінің иегері Күләш Әсімовалар ерен еңбектің үлгісін көрсетті. Кеңестік кезеңде Сейілбек Асанов, Шамахан Құндызбаевтар ша­руашылық жұмысын жүйелі ұйымдастыра білді. Тәуелсіздік жылдарындағы Қожабек Дәдікбаевтың есімі республикаға танылды. Бүгінде күріш фабрикасы аталған Шағандағы толымды тірлік пен еңбек жолын Сіздер жал­ғап келесіздер. Бұл ата-баба жолын жалғаған игі істің, батырлықтың үлгісімен сусындаған дала диқандарының өлшеусіз еңбегі іспетті. «Егінді өсіре білу – алғашқы асу ғана. Ысырапсыз жинап алу – мәре» деген даңғайыр диқан Ыбырай Жақаев. Күз маусымында дала еңбеккерлерінің мерейі тасып, абыройы асқақтайтын кезең екені баршаңызға белгілі. Осы салада еңбек етіп, мерейге бөленіп келесіздер. Шаруашылық жұмысын ілгерілетуге атсалысып келе жатқандарыңыз үшін алғысымды білдіремін, – деді Жеңісбек Шәкімбайұлы.

Өз құттықтауында серіктестік басшысы шаруашылықта атқарылып жатқан аутулы жұмыс­тарға тоқталып, биылғы нәтижені атап өтті.

Жалпы, шаруашылық диқандары биыл 2900 гектар алқапқа күріш дақылын орналастырды. Оның әр гектарынан орта есеппен 59,1 центнер өнім алып, қамбаға 171 500 центнер тонна астық құйды. Сонымен қатар, 550 гектар алқапқа бидай мен жоңышқа және 100 гектар алқапқа мақсары дақылдары егіліп, мол өнім жиналды.

Серіктестік жұмысын әртараптандыру мақ­сатында 320 шаршы метрді құрайтын жылыжай кешені салынған. Тамшылатып суару әдісімен егілетін қияр әр маусым сайын 700 келіге жуық өнім беруде. Сонымен бірге, осы жылдың мамыр айынан бастап «Шаған» сауда үйі іске қосылған. Нарық бағасынан бірнеше есе төмен дүкеннен ауыл халқы азық-түліктен бастап, тұрмысқа қажетінің бәрін таба алады.

Ардагерлердің бос уақытын тиімді пайдалану мақсатында шаруашылық демеушілігімен демалыс кешіні ашылды. Спорттың шахмат, үстел теннисі және бильярд түрлерінен арнайы кабинеттер бар. Ал алдағы уақытта се­ріктестіктің тарихынан сыр шертетін мұражай ұйымдастыру жоспарланыпты.

Одан бөлек, биылдан бастап «Қожабек ба­ғы» қайта қолға алынды. 900 түп алма аға­шының екі сорты өсетін баққа көкөністер мен бау-бақша өнімдері орналастырылған. Ал­ғашқы жылы жақсы өнім берген бақ тұр­ғын­дардың игілігіне қолданылуда. Айта ке­ту керек, шаруашылықтың қолдауымен «Қо­­­­­­жа­бек Дәдікбаев атындағы» шәкіртақы та­ғайын­далған. Ол білім саласындағы жоға­ры нәтижеге жеткен мектеп озаттарына бе­рілмек. Серіктестік мұнан басқа мәдени, спорт­тық сайыстарға және білім бәсекелеріне демеу­ші болып, ауылдың әл-ауқатының артуы­­­на септігін тигізуде.

Құттықтаудан соң еңбек озаттары мен жыл қорытындысы бойынша жоғары нәти­же көрсеткен 80-ге тарта шаруашылық қызметкері «Алғыс хат», қаржылай және ба­ғалы сыйлықпен марапатталды. Оның қатарында озат болған бригадирлер, күріш­шілер, комбайнерлар, механизаторлар бар. Сондай-ақ, серіктестің жүйелі жұмысын ақ­па­раттандырып жүрген республикалық, об­лыстық және аудандық БАҚ өкілдері де марапат тұғырынан көрінді.

Мерекелік салтанатта елді мекеннің дамуы­на айрықша үлес қосқан еңбек ардагерлері мен сала мамандарына аудан әкімінің «Алғыс хаты» табыс етілсе, ұзақ жылдан бері шаруа­шылықта жұмыс істеп келе жатқан майталман мамандар сый-құрметке бөленіп, құрметті зейнет демалысына шықты. Серіктестік директоры құрмет иелеріне шынайы ризашылығын жеткізді.

Қос мерекені қатар өткізген шағандық еңбеккерлердің құрметіне аудан және ауыл­дық өнер мектебінің өнерпаздары өз өнерлерін көрсетіп, көтеріңкі көңіл-күй сыйлады.

Ердос СӘРСЕНБЕКҰЛЫ