Дала диқандарына автокөлік кілті тарту етілді

Аудан әкімі Мұрат Ергешбаев «Ақжарма 2» шаруа қожалындағы «Алтын дән – 2021» мерекелік шарасына қатысты. Ауылдық мәдениет үйінде ұйымдастырылған шарада аудан басшысы еңбек озаттарын құттықтап, жыл үздіктерін марапаттады.

– Тарих парағын ақтарар болсақ осы өлкеден даңқты диқаншылар Нәзира Сисенова, Абат Сүлейменов, Балапан Арзымбетова, озат комбайнер Аманкелді Нұртаев пен Қуанышбек Алданов және сауыншы Сапура Балапановалар секілді еңбек ардагерлері «Құрмет», «Еңбек Қызылту» ордендерімен наградталып, есімдері Қазақстанның Алтын кітабына жазылды. Сонымен қатар Қазақстанға еңбегі сіңген зоотехник Сырдария ауданынының Құрметті Азаматты Құрман Сқақовтың есімі осы өлке тарихымен біте қайнасып жатыр.

Осы еңбек майталмандары салған дара жолды өздеріңіз жалғап, ел экономикасының артуына маңдай терлеріңізді төгіп келесіздер. Бұл еңбектеріңіз болашақ жас ұрпаққа үлгі өнеге болса, біздің ауданымыз үшін толағай табыстар әкеледі, – деді аудан әкімі Мұрат Нәлхожаұлы.

Мұнан соң дала диқандарына «Ы.Жақаев» І,ІІ дәрежелі «Еңбек даңқы», «Агроөнеркәсіп» төсбелгілерін тарту етіп, дала дүбірін қыздырған еңбеккерлерге алғыс хаттар табысталды. Ал жылдың озат күрішшісі мен бригадиріне жеңіл автокөліктің кілті тарту етілді. Салтанатты шара соңы концерттік бағдарламаға ұласты.

Айта кетейік биыл өңіріміздегі су тапшылығына қарамастан «Ақжарма 2» серіктестігінің диқандары 1 200 гектар алқапқа күріш дақылын орналастырып, оның әр гектарынан орта есеппен 60 центнер өнім жинады. Ел қамбасына 72 000 мың центнер Сыр салысын құйды.