Шіркейлідегі шуақты шара

Ауданға қарасты Шіркейлі ауылдық округінде ерекше жан­дарға арналған іс-шара ұйымдастырылды. Бұл жолғы са­йыс Ел Тәуелсіздігінің 30 жылдық мерейлі мерекесіне орай Шір­кейлі ауылдық округі әкімдігінің қолдауымен және «Сырдария – Ақпарат 2050» қоғамдық бірлестігінің ұйымдастыруымен өткізілді. Спорт бәсекесіне елді мекендегі мүмкіндігі шектеулі, бірақ қимыл-қозғалысқа ебі бар азаматтар белсенділікпен қа­тысты.

Спорттық іс-шараны ауыл әкімі Т.Құламқадіров ашып, қатысушыларды келе жатқан егемендік мерекесімен құт­тық­­тады.

– Тәуелсіздік – басты құн­дылығымыз. Елбасының жә­не Мемлекет басшысының тапсырмасымен азат елде ауқымды жұмыстар атқары­лып жатқанын жақсы біле­сіздер. Оның ішінде, Сырдария ауданында да, біздің ауылымызда да жоспарлы жұмыстар жоғары деңгейде орындалуда. Бұл – біздің тату тірлігіміз бен бекем бір­лігіміздің жемісі. Сіздерді Тә­уелсіздіктің 30 жылдық ме­­­рекесімен шын жүрек­тен құттықтаймын! Спорт бә­се­­­ке­сі­­не белсенділікпен қа­тысып, марапат биігі­нен көрі­нулеріңізге тілектеспін, – деген ауыл әкімі мүмкіндігі шектеулі азаматтардың ден­деріне саулық, отбасыларына амандық тіледі.

Мұнан соң спорттық іс-шара басталды. Қатысушылар бірнеше ойын түрлерінен сынға түсті. Оның ішінде, дартс, шашка және қол күресі тартысты өтті. Жеңіске ұмтылғандар жігері мықты екенін дәлелдеді. Жарыстың жоғары деңгейде өтуіне ауыл әкімдігінің, ауылдық мәдениет үйінің қызметкерлері, спорт мектебінің жат­тық­тырушылары ерекше атсалысты. Нәтижесінде, іс-шара жоғары деңгейде қоры­тындыланды. Ауыл әкімі жарысқа белсене қатысып, үздік көрсеткішке жеткен қатысушыларға «Алғыс хат» пен естелік сыйлық табыстады. Шіркейлідегі шуақты шара соңында аға буын өкілдері ақ батасын беріп, ұйымдастырушыларға ри­зашылығын білдірді. Іс-шара барысында ән мен жырдан шашу шашылып, қаты­сушылар көтеріңкі көңіл-күйге бөленді.

А.СЕЙІЛОВ