Туған жерін түлеткен тұлғалар

Жетікөл ауылы – тарихы терең мекен. Жайсаң мінезді адамдары ауылдың тұр­мыс-тіршілігімен біте қайнасқан. Туған жер то­пырағынан жыраққа кетпей, бар ғұ­мырын ауылдың жандануына арнаған азаматтар баршылық. Олар еңбегінің өтеуін сұрамайды. Олар ұрпағымен көктеп-көгеріп, мәуелі бәйтерекке айналған жандар. Елбасы Нұрсұлтан Назарбаевтың «Болашаққа бағдар: рухани жаңғыру» мақаласы аясында ауылдық мә­дениет үйінің ұйымдастыруымен «Туған жерін түлеткен тұлғалар» тақырыбында ең­бек адам­дарымен кездесу кеші өткізілді.

Танымдық кештің кейіпкерлері – қа­­жырлы қайратымен көпшілік ал­ғысына бөленген ауыл тұрғындары. Мәселен, ұзақ жылдар бойы халық баласын оқытуда алдына жан сал­маған ардагер-ұстаз Айшара Оспанова, ауыл шаруашылығы саласында түрлі техниканы тізгіндеген Мырзахмет Қожахметов, сауыншылықты қыз күнінен жанына серік еткен Сайлаукүл Жұмабаева, төрт түлекті түлетіп, мал шаруашылығына еңбегі сіңген Мәл­­каждар Бердібеков, бір жылдары автолавкада меңгеруші, ауылдық кеңесте хатшы қызметін атқарған Қа­йырғали Алиев, аядай ғана ауылда ветеринария саласын дөңгелеткен Клян Мұқашева, жүздеген көліктің жөйткіп жүруіне себепкер болған Ералы Алтынбековтің елеулі еңбегі ба­ғаланды.

Кеш барысында ауыл еңбеккер­лері­нің өмір жолы көпшілікке дәріп­телді. Бейнеттің зейнетін көрген әрбір ардагер ел игілігі жолында қызмет етуде мән-мағынаға толы естеліктерін айтып берді.

– Ауылымыздың азаматтары бар­­­­лық құрметке лайық. Ұрпақтар сабақ­тастығын жалғастырған кейінгі буынға үлгі-өнеге көрсетуіміз керек. Өз уа­қытында қызметімен елге танылған жандардың есімін көпке таныту құп­тарлық жағдай. Ардақты азамат пен аяулы аналар талай қиындықты еңсерді. Буыны бекімеген балаларға білім берген, ауыл шаруашылығы са­­ла­сында жүріп, ұйқысыз түндер өткерген ардагерлер арамызда отыр. Осыған дейін еткен еңбектерін жан баласына міндет қылмай, ел абыройын көтере білді. Біз оларға алғыс айтып, құрмет көрсетуге тиіспіз. Ал­дағы уақытта да Жетікөл ауы­лының гүл­денуіне қызмет ететін туған жер түлектерінің еңбегі елене берсін, – дейді ауылдық қоғамдық кеңес төра­ғасы Жарылқасын Камалов.

Тарих беттерінде өткен күннің ес­теліктері жаңғыра бермек. «Туған жер – тұғырың, туған ел – қыдырың» деген қазақта мақал бар. Алғаусыз алғысқа бөленген жандардың құр­метіне ауыл өнерпаздары туған жер жайлы және патриоттық әндер шыр­қады. Сонымен бірге, кеш қонақтарына арнайы сый-сияпат ұсынылды.

Балтабай ОРДАБЕКОВ