Еңбек – ер атандырады
Апта ағымында Ақжарма ауылында Елбасы Нұрсұлтан Назарбаевтың «Болашаққа бағдар: рухани жаңғыру» мақаласы аясында облыстық «Ұрпақтан ұрпаққа» қоғамдық бірлестігінің қолдауымен, ауыл әкімдігі мен мәдениет үйінің ұйымдастыруымен «Ленин» және «Октябрь революциясы» ордендерінің иегері Тұрсын Балапанов атындағы «Еңбек – ер атандырады» тақырыбында облыстық мүшәйра өткізілді. Оған облыстық «Ұрпақтан ұрпаққа» қоғамдық бірлестігінің төрайымы Алмагүл Божанова, аудандық мәдениет және тілдерді дамыту» бөлімінің басшысы Жеңіс Төралиев, ауыл әкімі Ерлан Ешмұратов, еңбек ардагерлері, ауыл тұрғындары, мүшәйра талапкерлері және даңқты майталманның ұрпақтары қатысты.Облыстық мүшәйрада 9 ақын бақ сынады. Екі кезең бойынша өткізілген мүшәйраға ақын, республикалық жыр бәсекелерінің жеңімпазы Мамыр Бәйдәулетов, ақын, аудандық «Тіршілік тынысы» газетінің бас редакторы Ақтөре Ибрагимұлы, мәдениет саласының ардагері Бүркітбай Мұстапаев төрелік етті. Өз кезегінде облыстық «Ұрпақтан ұрпаққа» қоғамдық бірлестігінің төрайымы Алмагүл Божанова сөз алып, еңбек майталманының өмір жолына тоқталды. Сонымен бірге, ауылдық және мектеп кітапханасына, Тұрсын Балапановтың ұрпақтарына авторлық кітаптарын тапсырды.
– Тұрсын Балапановтың есімі аудан тарихында ерекше аталады. Ауыл шаруашылығы саласында қажырлы еңбегімен танылған жанды ұлықтау – парыз. Осы ауданда қызмет етіп жүргенімде Тұрсекеңнің барлық жұмысына қаныққан едік. Ауданның тыныс-тіршілігін бағдарлап, аграрлық саланың өркендеуіне зор үлес қосты. Уақытпен санаспай техника тілін тапқан қайраткердің табандылығы мен батылдығын ел жұрты жақсы біледі. Қытымыр қыста Сырдария өзеніне түсіп кеткен тракторды алып шығуға үлес қосты.
Бұл туралы кеңінен өзімнің «Көпір» атты кітабымда жазған болатынмын. Ақиық ақын Асқар Тоқмағамбетов «Мұзбалақ» поэмасы арқылы Тұрсын Балапановтың ерлігін бар жағынан аша түсті. Осыдан 10 жыл бұрын арнайы қоғамдық бірлестік ашып, ел еңбеккерлерін дәріптеуге, жас ұрпақты тәрбиелеуге үлес қосып келеміз. Тұғырлы тұлғалар жөнінде бірнеше кітап жазылды. Танымдық іс-шаралар барысында еңселі азаматтарымызды көпшілікке таныта білдік. Бұл ретте, облыстық мүшәйрада жазба ақындар бар шеберліктерімен Тұрсекеңнің бітім-болмысын аша түседі деп сенеміз, – деді Алмагүл Божанова.
Іс-шара барысында ауылдық қоғамдық кеңес төрағасы Құдайберген Шыманов, еңбек ардагері Айтбай Әмзеев, Қалдыгүл мен Нышанкүл Тұрсынқызы сөз алып, даңқты азамат жайлы естеліктерімен бөлісті. Қызметтес болған жылдардағы түрлі оқиғаларды баян етті. Ел үшін атқарған елеулі еңбектерін тізбектеді. Өз кезегінде ардалы азаматтың ұрпақтары аудандық мәдениет және тілдерді дамыту бөлімінің басшысы Жеңіс Төралиевке естелік сыйлық тапсырды.
Өңіріміздің бірқатар аудандарынан келген ақындар Тұрсын Балапанов жайлы кестелі сөзбен өрнектеп, өлең шумақтарын арнады. Екінші кезеңде ҚР Тәуелсізідігінің 30 жылдығын жырға қосты. Әділ қазылардың шешімімен бас жүлдені қармақшылық Тұрар Бекмұрзаев, І орынды шиелілік Рахметулла Жолтаев, ІІ орынды жаңақорғандық Айман Үсенова, ІІІ орынды сырдариялық Мақсұт Әбсадықов, жалағаштық Нұрхан Қарабалаев иеленді. Ал аралдық Нұрбек Сәтжанов, сырдариялық Нұртуған Бердалыұлы, жаңақорғандық Мадияр Оспан, шиелілік Талғат Күзенбаев «Алғыс хатпен» марапатталды. Барлық қатысушы бағалы сыйлыққа ие болды.
Айта кетейік, ауылдық мәдениет үйінде суретшілер байқауы өткізіліп, қылқалам шеберлері өзара мықтыны анықтады.
Балтабай ОРДАБЕКОВ
