Шәкірттер сыйы
Мерейлі мейрам қарсаңында аудан орталығындағы білімнің қарашаңырағы №210 О.Әбілпаттаев атындағы мектепте мерекелік іс-шара өткізілді. Мұғалімдердің мерейін тасытқан концертті ұйымдастырушылар – «Жас ұлан» ұйымы мен 7 «Б» сыныбы. Сынып жетекшісі – Нұргүл Күдебаева. салтанатты жиынға ұйымдастырушылардың жоғары деңгейде дайындалғаны көрініп тұрды.Мерекелік іс-шараға мектеп директоры Света Мұхтарқызы бастаған ұжым ұстаздары мен оқушылар, жергілікті БАҚ өкілдері қатысты.
Жетінші сыныптықтар бірінен-бірі асқан өнерлі-ақ екен. Бастауыш сыныптардағы жетекшілері Сәуле Таюпованы ерекше құрметпен ортаға алып шыққан оқушылар пән мұғалімдеріне жыр-шашуларын арнады. Жас өрендер білім ордасында сапалы білім, саналы тәрбие беріп жүрген ұлағатты ұстаздарға да құрмет көрсетіп, әзіл аралас сұрақтарын қойып, мерекелік концертті еркін әрі қызықты етіп өткізді.
Кеш соңына таяу қауырт тіршіліктен бір сәт бой жазған ұстаздардың құшағы гүлге толып, мерекелік көңіл-күйге бөленді. Ұйымдастырушыларға ризашылығын білдірген мектеп директоры С.Сақтапова барша ұстаздар қауымын мерейлі мерекемен құттықтай отырып, жас өрендердің оқуда озат болуын тіледі.
Аружан МҰХАНБЕТҚАЛИ
