Жылулық сыйлаған күн
Әрбірінің қолында кішкентай ғана жүрекше таяқшалары бар оқушылардың жүзі бал-бұл жайнап тұр. Бірі мектебімен қауышқанына дән риза, бірі ұстазын сағынғаны, енді бірі сыныптастарын, достарын көргеніне марқайып, көңілдері көтеріліп тұрғаны сезіледі. 1 наурыз алғыс айту мерекесі қарсаңында №210 О.Әбілпаттаев атындағы орта мектеп оқушылары салтанатты іс-шара өткізді. «Біз алғыс айтамыз» атты мерекелік іс-шараны ұйымдастырушы орта мектептің 4 сынып оқушылары өз өнерлерін ортаға салды. Музыкамен әрлеген ұстаз Үміт Ерназар оқушыларға түрлі тақырыпта алғыс әндерін шырқатты. Ботакөз Баджанова мен Ұлмекен Алдамжарова сынып жетекшілік ететін білім ошағының балдырғандары алғыс өлеңдерін оқып, көрермен ықыласына бөленді.
2016 жылдан бері Елбасы шешімімен мерекеленіп келе жатқан бұл күннің ұрпаққа берер тағылымы мол. Алғыс айту күні қазақстандық патриотизмнің, достық пен бірлігіміздің жарқын күні. Елбасы Н.Назарбаев 130-дан аса этностың әрқайсысы өзінің қайталанбас өрнегін салуының нәтижесінде біртұтас ұлтымыз қалыптасқанын атап өткен еді. Мерекелік іс-шарада сөз алған білім ошағының директоры С.Сақтапова оқушылар мен ұстаздарды құттықтады.
– Алғыс айту күні – Қазақстан халқын біріктіруге бағытталған «Мәңгілік ел» жалпыұлттық патриоттық идеясының, қазақстандық бірегейліктің негізгі арқауы – еліміздегі барлық ұлт пен ұлысты бір шаңырақ астына топтастыратын Қазақстан халқы Ассамблеясының күні. Бұл күн тағдыр тоғыстырған Қазақстанның көпэтносты халқының ортақ тарихын құрметтеу күні болады. Қайырымдылық дәстүрлерін, әлеуметтік ынтымақты және өзара көмек көрсетуді қолдау күні. Бұл – репрессия мен жер аудару жылдарында біздің халық көрсеткен мейрімділік пен ақ көңілдік, қолда бармен бөлісу, көмек көрсету сынды рухани дәстүрлер күні ретінде мәңгі есте сақталады, – деді мектеп директоры Света Мұхтарқызы.
Осылайша, ән мен би көмкерілген салтанатты іс-шара соңында қонақтарға түрлі ризашылық сөздер жазылған жүрекшелер табысталып, оқушылар ақ көңіл, адал ниетпен өз алғыстарын жеткізді.
Майя ҚОЖАБАЙ
