Тәжірибесі толысқан басшы

Аудандағы дербес бөлімдердің ішінде аудандық ішкі сая­сат бөлімінің алатын орны ерекше. Барлық сала жұмысын идеологиялық тұрғыда ұтымды үйлестіріп, қоғам мен билік арасында алтын көпір болып келе жатқан бөлімнің атқарып жатқан жұмысы ауқымды. Мемлекеттік қызметшілер күніне орай бөлім басшысы Әлимаш Мырзахметова туралы жазуды жөн көрдік.

Мемлекеттік қызметте мерейі үстем Әлимаш Залқызы биыл асқаралы алпыс жас­қа толады. Еңбек жолын білім саласында бастаған ол бүгінгі күнге дейін аудандық дең­гейдегі қос бөлімді абыроймен басқарып, жауапты қызметтерді нәтижелі атқарды. Соң­ғы он жылдан бері аудандық ішкі саясат бөлімінің тізгінін ұстаған мемлекеттік қыз­метші – білікті басшы ғана емес, іскер ұйым­дастырушы. Оның дәлелі ретінде ауданды басқарған әкімдердің бастамаларының, жос­парларының, жұмыстарының қоғам арасында орнықты деңгейде қабылдануын, иде­ологиялық-имидждік жұмыстардың же­міс­ті жүргізілуін және ішкі саяси тұрақ­тылық пен бірегейлікті қамтамасыз ету бағы­тында ат­қарылған жұмыстарды айтуға болады.

Тәжірибесі толысқан мемлекеттік қыз­метші өз жұмысында екі ұстанымға ерекше басымдық береді. Оның біріншісі – әр жұмысты уақытылы атқару болса, екіншісі – сапалы аяқтау. Осы екі мақсат Әлимаш Мыр­захметованы ешқашан жерге қаратқан жоқ. Әріптестерінен де талап ететіні осы. Кейіпкерімізге ұстаздық қызметтен мем­лекеттік қызметке ауысу оңай болмағаны анық. Бірақ, басшылық тарапынан сеніп тапсырылған міндет пен жауапкершілікті терең сезінген жан барлық жұмысты игеріп кетті. Бұл оның талапшылдығы, өз міндетін орындауда тек тәртіпке сүйенетіні болса ке­рек-ті.

– Н.В.Гоголь атындағы педагогикалық инс­титутының орыс тілі және орыс әде­биеті факультетін бітіргеннен кейін, Жаңа­қорған ауданындағы №224 Өз­гент орта мектебінде мамандығым бо­йын­­ша оқушыларға дәріс бердім. Бел­сенділігімнен шығар, небәрі 29 жас­та мектеп директорының тәрбие ісі жөніндегі орынбасары қызметіне та­ғайындалдым. 1994 жылы Қазақстан Республикасы «Білім беру ісінің үз­дігі» белгісімен марапатталуым білім саласындағы көп жетістігімнің ең ма­ңыздысы деп білемін. Кейін Те­рең­өзек­тегі №35 И.Тоқтыбаев атын­дағы мектеп-лицейінде мұғалім, дирек­тордың тәрбие ісі жөніндегі орын­басары қызметтерін атқардым. Мемле­кет­тік қызметке ауысу жөнінде шешімді №210 О.Әбілпаттаев атындағы мектеп дирек­торының орынбасары кезімде, яғни 2006 жылы қабылдадым, – дейді 2006-2011 жылдары аудандық мәдениет және тілдерді дамыту бөлімін басқарған Әлимаш Мырзахметова.

Негізі, егемен еліміз гендерлік саясат бо­йынша нәзік жанды қыз-келіншектерге көп қолдау көрсетуде. Отбасы мен қоғамдық қызметті абыроймен атқарып жүрген Әлимаш Залқызы «білімге ұмтылған, ізденіске иек артқан әрбір азамат жетістіктерді бағындыра алады» дейді. Өзі де отбасында алған тәр­биесі бойынша тек тазалықты, әділдікті жақ­тайды. Көзінде от, кеудесінде жалын бар жастарды қолдағанды, жас мамандарға бағыт-бағдар бергенді жөн санайды. Қай қыз­метті атқарса да аға буын өкілдерінің пікі­рін ескеріп, әріптестерімен ақылдасып отырады. Ал үйде ұл-қыздарына, немерелеріне тәлімді тәрбиесін өнеге етіп, аналық ақыл-кеңесін беріп келеді.

Әлимаш Мырзахметовамен бірге мем­лекеттік қызметте еңбек еткен аудан басшылары оның іскерлігін, жасампаз идеяларға бай екенін, үлкен-кішімен тез тіл табысып, ортақ мақсат жолында аянбай жұмыс іс­тейтінін жоғары бағалайды. Ал өзі қатарлы әріптестері кейіпкеріміздің талапшылдығын, әр істің ретін табатынын үлгі етсе, кейінгі тол­қын жастар өздеріне ақылшы ұстаз тұтады. Ол ауданымыздағы өзге ұлт өкілдерінің се­німді серігі, жақсылыққа ұмтылған жас­тар­дың қолдаушысы. Ерекшелігі сол, мем­лекеттік қызметшіні республикалық және жер­гілікті деңгейдегі бұқаралық ақпарат құ­­рал­дарының өкілдері ерекше құрметтейді. Сый­ластыққа негізделген құрметтің талай мәрте куәсі де болғанбыз. Мысалы, танымал журналист Миуа Байназарова кейіпкеріміздің өз жұмысына деген жауапкершілігін айтады.

– Кейде Әлимашты үйден гөрі жұмыста көп уақытын өткізетін шығар деп ойлаймын. Себебі, қашан хабарлассақ та жұмыста отырады, іздеп келсек те жұмысынан табылады. Көп сапарларда, жиналыстарда бірге болдық, пікірлестік. Ол өз міндетіне адал, тәжірибесі толысқан басшы ретінде зор құрметке ие. Ер азаматтармен қатар еңбек етіп, абыройға кенелген замандасымыздың жұмысына жеміс тілеймін, – дейді Миуа Байназарова.

Білікті басшы – отбасында аяулы ана, ардақты әже. Ұлы Ерболат аудан ор­та­лығындағы №210 О.Әбілпаттаев атын­дағы орта мектебінің алғашқы әскери дайындық пәні мұғалімі болса, қызы Эльвира – №131 Т.Қозыбаев атындағы орта мектебінің әлеу­меттік педагогі. Немерелерінің үлкені бас­тауыш сыныптың үздік оқушысы болса, кейінгілері – балабақшаның тәрбиеленушісі. Олар әжесінің, ата-анасының сенімі мен үмітін ақтауды өздеріне парыз санайды. Кейіпкеріміз де «барым да, нарым да ұр­пақтарым» дейді.

– Әйел адамға мекеме басқару оңай емес. Үйдегі аналық міндетті де ұмытуға бол­майды. Мемлекеттік қызмет саласын таңдап, ауданымыздың әлеуметтік-эконо­микалық дамуына өз үлесімді қосқанымды мақтаныш етемін. Бүгінгі күнге дейін алған марапаттарым әріптестеріммен бір­лесе атқарған жұмыстың нәтижесі деп білемін. Сондықтан маған сенім артқан бас­шыларға алғысымды айтамын, бірлесе ең­бек еткен әріптестеріме ризашылығымды білдіремін, – дейді Әлимаш Мырзахметова.

Мерейі үстем мемлекеттік қызметшінің жауапты жұмысына жеміс тілеп, кәсіби мере­кесімен құттықтаймыз!

Ақтөре ИБРАГИМҰЛЫ