Қауіпсіздік шараларын түсіндірді

Елде қауіпті індет тарап, халықты сарсаңға салғалы бір жылдан аса уақыт өтті. Осы аралықта мемлекет тиісті шараларды қабылдап, коронавируспен күрес тұрақты түрде жүргізіліп келеді.

Вируспен күресудің бірден-бір жолы – халықты дұрыс ақпараттандыру. Осы мақ­сатта аудан әкімдігінде кәсіп­керлермен кездесу өтті. Бас қосуға Қызыл­орда облысының санитариялық-эпидемио­ло­гия­лық бақылау департаменті басшы­сының орынбасары Ұ.Аханаева, Сырдария ауданының бас мемлекеттік санитариялық дәрігерінің міндетін атқа­рушы Қ.Омарова, құқық қорғаушылар, дербес бөлім қыз­меткерлері, мониторинг топ мүшелері мен жеке кәсіпкерлер қатысты.

Жиналысты аудан әкімінің орынбасары Д.Байдушев жүргізіп, бірқатар келелі мәселелер талқыланды.

– Алғашқыда түрлі түсінбеушілік туын­дағанымен, халықтың вируспен бірге тіршілігін жалғастырып келе жатқалы екінші жыл. Алғашқы кезеңдерде қаншама адам қайтыс болғаны өздеріңізге мәлім.Карантиндік шаралар ұйымдас­тырылып, көп жерде шектеу қойылды. Дегенмен, тіршілікті тоқ­татып қоймай­тынымыз анық. Бүгінде белгі­ленген нормалар бойынша тамақтану орындарының жұ­мысына рұқсат етілген. Бұл жерде басты назарды қауіпсіздік шараларына аудару қажет, – деген Ұлбосын Өмірбайқызы көпшілік тамақтану орындары қызметіне қатысты Сырдария ауданынан осы күнге дейін карантиндік талаптарды бұзу фактісінің тіркелмегеніне тоқталып өтті.

Кафе немесе асханаларда өзге орын­дарға қарағанда қауіптің басым бола­тындығы түсі­нікті. Себебі, онда адамдар бетпердесіз тамақ­танады. Вирустың екі метр қашықтыққа дейін еркін жұғып, одан бөлек жиһаздардың бетіне де қонуы мүмкін екендігін ескерсек, мәселе күрделене түседі. Вирус тасымалдаушы өзі де білмей өзгенің өміріне қауіп төндіруі мүмкін.

Осы ретте, Қызылорда облысының сани­тариялық-эпидемиологиялық бақы­лау депар­таменті басшысының орынбасары тамақтану орындарының «Ashyq» мобильді қосымшасына тіркелуі ма­ңызды екеніне баса тоқталды. Жоба өз кезегінде, кәсіпкерлік нысандардың қайта жандануына мүмкіндік бермек. Ол бойынша тұтынушылардың ауыр­ғаны, вакциналанғаны немесе сау екені анық­талады. Осылайша, жұқтыру қаупі сейіліп, індет жұқтырушылар санын азай­туға болады.

Сондай-ақ ауырған адаммен байланыс­та болып, он төрт күнге оқшауланған тұл­ғаның сол уақыт аралығында көпшілік арасында жүруі де қасақана қылмыс деп табылып, жауапқа тартылатындығы айтылды.

Жиын соңында қатысушылар көкей­дегі сұ­рақ­тарына жауап алып, қажетті мәліметтермен ақ­па­рат­тан­ды­рыл­ды.

Аружан МҰХАНБЕТҚАЛИ