Іргелі серіктестік өткен жылды табысты қорытындылады. Нағи­лық диқандар былтыр су жетіспеушілік мәселесін бірлесе еңсеріп, қам­баға мол астық құйды. Атап айт­қанда, 2020 жылы шаруашылық 5100 гектарға Сыр дақылын ексе, оның әр гектарынан 70 центнерден жоғары өнім алды. Нәтижесінде, аудан шаруашылықтарының ішінде ал­дыңғы қатардан көрінді.

Ел қамбасын алтын дәнге тол­тырған еңбек майталмандарына серіктестік жыл сайын «Алтын дән» мерекесін ұйымдастырып, құрмет көрсетеді. Егінжай ерлерінің елеулі еңбектерін атап, озаттарды марапаттайды. Былтыр да карантиндік шектеу талаптары сақталып, еңбек­шілер мерекесі іргелі ұжымның құ­рылғанына 15 жыл толу мерейтойымен қатар атап өтілген.

– Біз өткен жылы «Мағжан және К» ЖШС-нің 15 жылдығын атап өттік. Шаруашылық құрылған жылдан бастап ата кәсіпті дамытып, ауыл халқын жұмыспен қамтып келеді. Осы уақыт аралығында шаруашылық іргелі ұжымға айналды, заманауи техникалармен толықты. Мұның барлығы ауыл халқының, еңбеккерлердің ауыз­­бірлігінің арқасы. Сол үшін де біз ауылдың гүлденуін үнемі назарда ұстаймыз. Сонымен бірге әр жыл сайын еңбек адамдарына құрмет көр­сетіп келеміз, – дейді серіктестік төр­а­ғасы Д.Ералиев.

Серіктестіктің 15 жылдың мерейтойына мерекелік медальдар әзір­леніп, әр саладағы еңбек озат­тарына табысталған. Оған қоса, то­лағай табыстарға қол жеткізген ең­беккерлер автокөлік мінген. Атап айтқанда, озат бригадирлер Бақтияр Кішаев пен Беркінбай Ембергенов, озат жаткист Бауыржан Ысқақ, озат комбайншы Азамат Құрақбаев, озат күрішші Жасұлан Мығымбаев еселі еңбектерінің нәтижесін көрді. Одан бө­лек, жылдағы үрдіспен шаруашылық қызметкерлері бағалы сыйлық алған. Бұл ретте, шаруашылық жұмысын ақпараттандырған әріп­тестері­міздің ме­рекелік медальмен марапат­тал­ға­нын да атап өтуіміз керек.

Айта кету керек, өткен жылы ди­қандар Бақытжан Сыздықов (82ц), Асхат Асқарбеков (81ц), Мұрат Жақ­сыбаевтар (81 ц) озаттар көшін бас­таған.

Жалпы, жыл басынан биыл су тапшылығы болатыны айтылып, қазір шаруалар сол қиындықты бас­тан өткеруде. Осыған байланысты «Мағжан және К» ЖШС жыл өткен сайын егістік көлемін қысқартып, әртараптандыру жұмыстарына басымдық беріп ке­леді.

– Біз биыл 5000 гектарға күріш егудеміз. Су тапшылығына орай екі жыл көлемінде 200 гектар егіс­тік алқап қысқартылды. Судың же­тіспеушілігі егін науқанына кері әсерін тигізуде. Олай дейтінім, біз осы уақытта егін науқанын толық аяқтап, күрішті суға бастырып болатынбыз. Ал қазіргі таңда серіктестік еңбеккерлері 3700 гектар жерге дән сеуіп, оның 3200 гектары суға бастырылды, – дейді Дархан Жұмашұлы.

Сонымен қатар шаруашылық биыл 400 гектар жерге бидай, 2150 гектарға ескі жоңышқа, 600 гектар жерге жаңа жоңышқа еккен. Ал суды аз қажет ететін дақылдардың ішінде арпа 100 гектар жерге орналастырылған. Сондай-ақ осы жылы 10 гектар жерге зығыр дақылы егілген. Бұл дақылды биыл тәжірибе жүзінде сынап көрмек. Өнімі мол болса, келер жылы зығыр егу көлемін арттырады.

Науқандық жұмыстарға серіктес­тіктің техникалары толығымен жасақ­талған. Қазіргі таңда шаруашылықта 22 «МТЗ-80», 8 «John Deere» тракторы бар. Оған қоса, 6 лазерь арқылы тегістегіш техникасы мен «Скрепер» тракторлары атыздарды теп-тегіс етуге пайдаланылған. Биылғы егін егу науқанына серіктестік 5 жаңа соқа алған. Сондай-ақ «Claas» комбайнын сатып алмақ. Жалпы айтқанда, бүгінде іргелі шаруашылықтың 90 па­йыз техникасы жаңарған.

Д.Ералиев басқаратын іргелі шаруашылық бүгінде 500-ге жу­ық адамды жұмыспен қамтып отыр. Базасы жасақталған. Өзге шаруа­шылықтардағыдай тұқымды сатып алмайды. Серіктестіктің тұқым зауы­­тында жыл сайынғы күріш тұқымы әзірленіп, оны басқа шаруашылықтар тұтынады. Тұқым шаруашылығы саналатын серіктестік бидай, жоңышқа тұқымдарын да даярлайды.

Биылғы жылы өзге шаруа­шы­лықтарға 2500 тонна күріш тұқымы сатылған. Сондай-ақ 1000 тонна бидай мен 300 тонна жоңышқа тұқымы әзірленіп, сұранысқа сай сатылыпты.

Сапалы тұқым даярлау үшін бұл іске арналған құрылғылар жа­ңар­ған. Сондай-ақ өткен жылы шаруа­­шылықтың қырманы да қайта жаң­ғыр­тудан өтіпті.

– Биыл қырманға асхана мен жа­тақ­хана салуды жоспарлап отыр­­­мыз. Серіктестік еңбеккерлерді ыс­­тық та­мақпен қамтамасыз етіп ке­леді. Енді жатақхана салсақ, еңбек ада­мының тынығып алуына мүмкіндік болады. Сондай-ақ басқа ауылдардан қатынап істейтін шаруашылық еңбеккерлеріне жатақхана өте тиімді, – деді аудандық мәслихат депутаты Дархан Жұмашұлы.

Бүгінгі таңда серіктестік тарапынан шаруашылық жұмысын әр­тараптандыруға басымдық берілу­де. Соған сәйкес биыл 6,5 гектар жерді қамтитын алма бағы ашылған. Онда алманың «семеренко» және «голден делишес» сорттарынан 3000 түп отырғызылған. Бұл – шаруашылық адамдарын, жалпы ауыл халқын жеміс­пен қамту бағытындағы игі іс.

Елбасы Н.Ә.Назарбаев үлгілі ауыл­ға келгенде «Барлық ауыл Нағи­дай болсын» деп бекер айтқан жоқ. Шаруашылық жұмысы ілгерілеп, әле­уеті артқанда елді мекенді гүл­ден­діруді қолға алды. Содан бастап бүгінге дейін ауылдағы әлеу­меттік нысандардың салынуына ұйытқы болып, Нағи Ілиясов елді мекенін көркейтуге қомақты қар­жы бөліп келеді. Мәселен, серіктес­тік ауыл тазалығын сақтауды тұрақ­ты бақылауда ұстайды. Гүлден­діру де шаруашылық есебінен жүр­гізіледі. Биылдың өзінде бірқатар әлеу­меттік нысандардың жөнделуін жүзеге асырған. Атап айтқанда, же­кеменшік әріптестік аясында ауыл орталығындағы мәдениет үйінің жөн­деу жұмыстарын жүргізген. Халықтың денсаулығын жіті қадағалайтын ауылдық емхананы да ағымдағы жөндеуден өткізіп берді.

Сондай-ақ «Балдырған» бала­бақшасына 40 секциялық шкаф, 90 орындық, 25 үстел және 2 теледидар мен 2 тақта алып берді. Демеушілік көмектің жалпы сомасы 2 млн 300 мың теңгені құрайды. Елді мекен орталығынан балаларға арналған ойын алаңын да серіктестік салып берді. Балалар ойын алаңы заманауи үлгіде жабдықталған. Бұл жерде балалар ойын ойнаумен қатар спортпен де шұғылдана алады. Сонымен бірге сырғанайтын шағын жабдықтар мен әткеншектер қойылған. Ең бас­тысы, ойын алаңы ауылдың барлық тұрғындары үшін қолжетімді.

Бұдан бөлек, серіктестік шаруа­шылық еңбеккерлерін сұраныс­тарына сай малға қажетті жем-шөппен қам­тып келеді. Ал қыс мезгілінде ауыл хал­қына 2 тоннадан тегін көмір тү­сіріп берген.