АҚ ЖАУЛЫҚТЫ ӘЗИЗ АНАЛАРДЫ ҚҰТТЫҚТАДЫ
8 наурыз – Халықаралық әйелдер күні орай аудан әкімі Ғ.Қазантаев құрылыс саласының ардагері, байырғы құрылысшы Бисенкүл Сариева мен білім саласының ардагері Зоя Алданқызын мерекемен құттықтап, сый-сияпат көрсетті. Мерекелік құттықтауда аудан әкімімен бірге аудан әкімінің орынбасарлары Б.Лекеров, Е.Ахетов, кент әкімі Н.Бисембаев бірге жүрді.
Байырғы құрылысшыны құттықтаған аудан басшысы оның жасаған елеулі еңбегі көпке үлгі екенін айтты. Сонымен қатар, аудандағы ғимараттардың көпшілігінде құрметті жанның қолтаңбасы қалғанын жеткізді. Осы жылы аудан орталығында көпқабатты зәулім үйлер бой көтермек. Аудан әкімі Ғ.Қазантаев көпқабатты үйлердің іргетасын құрылыс саласының ардагерімен бірге қалап, құрылыс жұмыстары басталатынын тілге тиек етті. Ауданның дамуына дән риза екенін білдірген ардақты жан өз алғысын жеткізді.
Мұнан соң ұлағатты ұстаз, білім саласының ардагері Зоя Алданқызын да шуақты мерекемен құттықтап, гүл шоқтарын ұсынды. Ауданның өркендеуін, оның ішінде білім саласындағы жетістіктерді атап өткен аудан басшысы сапалы білім мен саналы тәрбие беруде мерейлі ұстаздардың салған сара жолы кейінгілерге өмірлік азық болып жатқандығын айтты. Өз кезегінде ұлағатты ұстаз да ризашылығын білдірді.
Көктемнің шуақты мерекесінде ақ жаулықты әзиз аналарға аудан басшысы «Құттықтау хат» пен сыйлықтарын табыс етті.
Е.БЕРКІНБАЕВ
