Бір сыныптың үздіктері
№35 И.Тоқтыбаев атындағы мектеп-лицейдің 1а сыныбына білікті ұстаз Лаура Бақытқызы жетекшілік етеді. Сыныпта 21 оқушы бар. Олардың 15-і үздік оқушы. Оқушылар қазіргі жағдайға байланысты кезекші топқа бөлініп, санитарлық талапқа сай білім алуда.Даярлық сыныптан бастап дәріс беретін ұстаздың шәкірттері білім бәйгесінде топ жарып, үздіктер қатарынан көрінді. Жақында 6 оқушы сауат ашу және математика пәні бойынша www.ubtest.kz сайты онлайн форматта ұйымдастырған байқауға қатысып, жоғары нәтиже көрсетті. Республикалық қашықтық олимпиадасының қорытындысымен жеңімпаздар арнайы дипломмен және сертификатпен марапатталды.
−Оқушылардың барлығы да білімге құмар. Олардың жаңаны үйренуге деген қабілеті де тамаша. Даярлық сыныптан бастап әріптерді танытып, оқуды бастадық. Қазір бірінші сыныптың бағдарламасын игерудеміз. Шығармашылық ізденіс − үздік шәкірт тәрбиелеудің негізі, − дейді бірінші санатты мұғалім Л.Бақытқызы.
2014 жылдан бері білім ошағында еңбек ететін бастауыш сынып мұғалімінің мақсаты − әрбір оқушының жүрегінен орын алу, тәлімді тәрбие мен сапалы білім беру. Ол үшін тәжірибелі ұстаз жыл сайын біліктілігін арттырып келеді.
Бибісара ЖАНӘЛІ
