Ауқымды жұмыс атқарылуда
Ақындар «Ақ Шағаным» деп жырлаған аудандағы үлкен ауыл бүгінде дамудың даңғыл жолына түскен. 5 мыңға жуық халқы бар елді мекенде жыл өткен сайын әлеуметтік мәселелер кезегімен шешімін тауып, тұрғындар тұрмысы түзеліп келеді. «Ауыл» жобасы аясында Шаған елді мекеніне барып, атқарылған жұмыстармен таныстық. Ауыл әкімі Ұлбала Абдраманова биылғы жылы ауылда ауқымды жұмыстар атқарылғанын жеткізді.– Биылғы жылдың 11 айының жоспары бойынша қаржы толық игерілді. Осының негізінде, ауылдағы мекемелер жұмысы жүйелі ұйымдастырылуда. Биыл елді мекендегі Ә.Атақаев көшесін жарықтандыруға аудандық бюджеттен қаржы бөлініп, тиісті жұмыстар жүргізілді. Оған қоса, Ғ.Мұратбаев көшесіндегі жарықтандыру жүйесіндегі ескірген жарықшамдар ауыстырылды. Ал ауылды абаттандыру мен көгалдандыру бойынша Ж.Омаров пен Т.Мұхамеджанов көшесіне «Жұмыспен қамту жол картасы» бағдарламасы аясында ойын алаңы салынды. Бұған 4 адам жұмысқа тартылды, – дейді ауыл әкімі.
Сондай-ақ биыл ауылдық мәдениет үйіне жаңадан музыкалық аппаратура алынған. Ал ауыл әкімінің өкімімен №14 «Алтын сақа» балабақшасы «Бөбекжай балабақшасы» болып бекітіліп, мұнда логопед кабинеті ашылып, жабдықталған. Елді мекендегі «Балбөбек» балабақшасы да балғындарға мектепке дейінгі тәрбие беруде нәтижелі жұмыс атқаруда.
Шағанда кәсіпкерлік саласы бойынша өз ісін дөңгелетіп отырғандар жетерлік. Мәселен, елді мекенде 164 шағын және орта кәсіпкерлік субъектісі тіркелген. Оның ішінде, биыл «Еңбек» нәтижелі жұмыспен қамту және жаппай кәсіпкерлікті дамыту» бағдарламасының екінші бағыты бойынша «Ауылшаруашылық қолдау қоры» АҚ арқылы 6 жоба несилендіріліпті. Аталған бағдарлама бойынша «Микробизнес-Қызылорда» ЖШС арқылы 2 жоба қаржыландырылған. Сонымен бірге «Стартап» жаңа бизнес идеяларды іске асыру мақсатында 29 шағандық түрлі жобалар бойынша мемлекеттік грантқа ие болған. Ал «Қарапайым заттар экономикасы» бағдарламасының субсидиялау тетігі шеңберінде 1 жоба «Аграрлық несие корпорациясына» АҚ арқылы қаржыландырылыпты. Кәсіп ашыуға ниетті 22 адам «Бизнес бастау» жобасы бойынша кәсіпкерлікті игеру бағытында оқытылған.
Ауылда әлеуметтік жағдайды жақсарту бағытында тұрғындар ынтымақ пен тұтастықты ту етіп келеді. Оның ішінде пандемия кезеңінде кәсіпкерлер халыққа көмек қолын созған.
– Ауылымызда тұрақты түрде қайырымдылық акциялары жүргізіліп келеді. «Шаған Жер» ЖШС, ауыл көлеміндегі мекемелер, жеке кәсіпкерлер және ауыл жастары демеушілігімен бүгінге дейін 176 отбасыға азық-түлік, киім-кешек, мектеп құрал-жабдықтары негізінде көмек көрсетілді. Төтенше жағдай кезінде ауыл кәсіпкерлері Ә.Прәлиев А.Бердібекұлы қайырымдылық жасады. Сонымен қатар «Шаған Жер» ЖШС медициналық құралдармен қоса 10 оқушыға және кәсіпкер Д.Нұрмағанбетов 2 оқушыға планшеттер алып берді. Қазіргі жылу маусымында да бірқатар кәсіпкертұрмысы төмен отбасыларға көмір түсіріп беріп, өз көмектерін аямауда, – дейді ауыл әкімі Ұ.Абдраманова.
