«Батыс Еуропа – Батыс Қытай» халықаралық транзиттік автожолының бойында ата кәсіпті қолға алған Ақжарма ауы­лы тіректі елді мекендер қа­та­рына кіреді. Қазіргі таңда «Ауыл – ел бесігі» бағдарламасы негізінде мұнда қарқынды жұ­мыстар жүргізілуде. Атап айт­қанда, бағдарлама аясында Ақ­жарма ауылы 699 млн теңге көлемінде қаржыландырылып отыр. Бұл қаржыға Садық ахун, А.Есентұров, Т.Балапанов және М.Әукенов көшесі жарықтан­дырылса, М.Томпалақов, Ж.Домбаев, Садық ахун, М.Әукенов, Е.Омаров, А.Есентұров, Т.Балапанов, Б.Арыстанов, О.Ысқақов көшелері орташа жөнделуде. Сондай-ақ, А.Есентұров, Е.Омаров, Садық ахун көшесіне темір-бетонды лоток орнатылып жатыр. Бүгінгі күні мердігер мекемелер тиісті жұмыстарды жүргізуде.

– Ақжарма ауылы ауыз сумен, автомобиль жолдарымен, жарықпен, бас­панамен қамтамасыз етілген. Ауылға кіреберіс басты көшеге аудандық мәслихат депутаты, «Ақжарма-2» шаруа қожалығының төрағасы Марат Бисеновтің демеушілігімен 15 млн теңгеге 150 жарық бағанасы орнатылды. Өткен жылы «Жастар жылы» аясында ауыл орталығынан аллея ашылған болатын. Ал, «Ақжарма және К» ЖШС төрағасы Қайрат Нұрсейітов бастаған ауыл кәсіпкерлерінің қолдауымен мұсылмандар мешіті пайдалануға берілді. Сонымен бірге, көп балалы және жас мамандар жаңа баспанаға ие болды, – дейді ауыл әкімі Ерлан Ешмұратов.

Қазіргі уақытта елді мекенде мем­ле­кеттік бағдарлама аясында кә­сі­бін ашқандар бар. «Еңбек» нәти­желі жұ­мыспен қамтуды және жаппай кә­сіп­керлікті дамытудың 2017-2021 жыл­дарға арналған бағдарламасымен мал шаруашылығымен айналысу үшін бірқа­тар азамат қайтарымсыз грантқа қол жет­кіз­ген. Бүгінде кәсіпкерлік бағытта 103 нысан мен 48 қожалық жұмыс жасау­­да.