50 ардагер аудандық газетке тегін жазылды

«Жан-Арай» ЖШС директоры, «Сырдария ау­да­ны­ның Құрметті азаматы» Бақдәулет Мақашев ау­дандық «Тіршілік тынысы» газеті редак­ция­сының ұсынысына сәйкес сырдариялық 50 ар­да­гердің мекен-жайына аудандық басылымды демеушілікпен жаздыртып берді. Бұл халық қа­лау­лысының аға буын өкілдеріне деген шынайы құрметі деп қабылдадық.

Былтыр редакция «Аудандағы әр отбасыға аудандық газет баруы тиіс» деген ұранмен игі бастама көтерген болатын. Сол бастаманың аясында ардагерлер мен мүмкіндігі шектеулі азаматтардың мекен-жайына демеушілер есебінен жергілікті газетті жаздыртып беру жұмыстары жүргізілуде. Міне, облыстық мәслихат депутаты Бақдәулет Мақашевтың 50 ардагердің төл газеттің тұрақты оқырманына айналуы­­на қосқан үлесі де осы бастаманың жемісі.

– Саналы ғұмырын ауданның дамуы мен өсіп-өркендеуіне арнаған ардагерлерге құрмет көрсету – біздің парызымыз. Бұған дейін де «Жан-Арай» серіктестігі тарапынан әлеуметтік қолдау шаралары ұйымдастырылып келеді. Бұл жолы аудандық газет редакциясының ұсынысына сәйкес 50 ардагердің мекен-жайына аудандық газетті жаздыртып бергенді жөн көрдік. Енді ардагерлер 2021 жылдың бірінші жартыжылдығында аудандық газеттен жаңалықтарды оқитын болады, – дейді серіктестік директоры Бақдәулет Еркінбекұлы.

Айта кету керек, төтенше жағдай кезеңінде «Жан-Арай» ЖШС тарапынан аудандағы әлеуметтік аз қамтамасыз етілген отбасыларға азық-түлік топтастырылған қайырымдылық көмек көрсетілген болатын. Аталған қолдауды сезінген отбасылардың серіктестікке деген ризашылығы шексіз. Лайым, елдің мұң-мұқтажын ескеріп, қолда бармен бөлісуге дайын тұратын азаматтардың кәсібі берекелі болғай!

Роза ТҰРҒАНБЕКОВА,

аудандық газеттің

баспасөз маманы