47 еңбек ардагері аудандық газетті тегін алады

Сыр спортында өзіндік орны бар Сұлтан Қобландиннің есімі аудан жұртшылығына жақсы таныс. 150-ге жуық Қазақстанның спорт ше­берін дайындаған білікті бапкер бүгінде «Қайсар» спорт клубының аға жаттықтырушысы қызметін атқарады. Ол сондай-ақ аудандық газеттің тұрақты оқырманы әрі жанашыры.

Аудандық басылымға қолдау көрсетуге ниеттенген спорт майталманы Сұлтан Қобландин жақында редакцияға келді. Ол бас редактордың қабылдауында болып, еңбек ардагерлерінің мекен-жайына аудандық басылымды жаздыртып беруге ынталы екенін жеткізді. Біз басылым жанашырының бұл ұсынысын қабыл алып, жұмысты үйлестіруге кірісіп кеттік. Қалжан ахун ауылының газет таратушысы Баян Әбілдаеваның берген мәліметі бойынша елді мекендегі 47 еңбек ардагерінің мекен жайына 2021 жылдың алғашқы жартыжылдығына арналған газет түбіртегі толтырылды.

– Қазір әлем қауіпті індетпен күрес жүргізуде. Аудандық газет бұл бағытта нақты түсіндірме жұмыстарын кеңінен жүргізуде. Газетте мамандардың кеңесі, зиялы қауым өкілдерінің пікірі тұрақты түрде берілуде. Аудан әкімдігі жанынан қүрылған жұмысшы топтардың атқарған жұмысы да ақпараттандырылуда. Жанашырлықты ту еткен азаматтардың қайырымдылық шаралары насихатталуда. Дерттен айыққан азаматтармен де сұхбат жарияланды. Мұның бәрі аудандық басылымның қоғамдағы өзгерістерге дайын екенін білдіреді. Осыны ескеріп еңбек ардагерлеріне құрметіміз болсын деген ойда аудандық газетті жаздыртып беруді қолға алдық. Алдағы уақытта да бұл бағыттағы жұмыстар жалғасатын болады, – дейді Сұлтан Қобландин.

Атап өту керек, аудандық газет таралымы 2019 жылмен салыстырғанда бір жылда 655 данаға артты. Бүгінде газет аптасына екі рет 3749 данамен таратылуда. Бұл Тәуелсіздік жылдарындағы ең жоғары көрсеткіш. «Аудандағы әр отбасыға аудандық газет баруы тиіс» деген ұстанымды ұстайтын редакция ұжымы басылым таралымын арттыру бағытындағы жұмыстарды алдағы уақытта да жүргізе беретін болады. Осы ретте басылым жанашыры Сұлтан Қобландин секілді азаматтарға алғыс айтып, жұмыстарына жеміс тілейміз.

Роза ТҰРҒАНБЕКОВА,

аудандық газеттің

баспасөз маманы