Кәсіби емес медиаторлар марапатталды

Медиация – мүдделі емес тараптың қатысуымен өтетін дауларды реттеудің жаңа түрі. Ол жанжалдардың алдын алу және оларды сотқа жеткізбей шешу, сол сияқты халықтың құқықтық сауаттылығын нығайтуды көздейді. Бүгінгі таңда қоғамдық сананы жаңғыртудың бірден-бір жолы медиация институтын дамыту болып отыр. Соған байланысты елімізде 5 тамыз – медиация күні болып бекітілген. Кеше аудан орталығындағы «Достық үйінде» кездесу өтіп, дау-жанжалдың шешілуіне атсалысып жүрген кәсіби емес медиаторлар марапатталды.

Кездесуде аудан әкімінің орынбасары Д.Байдушев медицияның қазіргі қоғамда маңызы зор екенін атап көрсетті.

– Ел болған соң халық арасында дау-жанжалдар орын алып тұрады. Сол кездерде халықтың бір-бірімен татуласуына медиация қызметінің маңыздылығы жоғары. Өйткені медиаторлардың көмегімен ұрыс-керіс сотқа дейін жетпей, өзара татуласуға мүмкіндік жасалады. Ауданда медиация қызметінде 38 азаматтық, 10 әкімшілік және 4 қылмыстық іс шешімін тапқан. Осындай қызметте әркез белсенділік танытып жүрген жандарға алғысымыз зор, – деген аудан әкімінің орынбасары кәсіби емес медиаторларды марапаттады. Атап айтқанда, Муса Келдібаев, Ұлмекен Жанәлиева және Мектепхан Елеусіновке аудан әкімінің «Құттықтауын» табыс етіп, сый-құрмет көрсетті.

Айта кетейік, аудан бойынша 6 аудандық және 43 ауылдық округтік кәсіби емес медиаторлар тіркелген. Биылғы жылдың есепті кезеңінде олардың қатысуымен 117 дау шешімін тапқан.