Түсіндірме жұмыстары жүргізілді

Қазақстан Республикасының Жоғарғы Соты төтенше жағдайдың енгізілуіне байланыс­ты сот тәжірибесінің кейбір мәселелері бойынша №1 түсіндірме берген. Осы түсіндірмені насихаттау мақсатында, төтенше жағдай енгізу кезінде және одан кейінгі кезеңдерде аймақтағы жағдайды анықтау, тиісті шешім қабылдау бағытында Қызылорда облыстық сотының іс-шаралар жоспары бекітілген. Сол бойынша аудандық сотта онлайн семинар өтті. Оған аудан әкімінің орынбасары Т.Нұртазаев, аудан прокуроры Е.Алмазұлы, аудандық полиция бөлімі бастығының орынбасары Е.Жаналиев және тергеу бөлімінің бастығы Б.Тұрманов «Trueconf» мобильді байланысы арқылы қатысты. Онлайн семинарда аудандық сот төрағасы Р.Алдамбергенов түсіндірме жұмыстарының басты мақсаты орын алған күрделі кезеңде ел экономикасын қолдауға, халықтың әл-ауқатын арттыруға, қоғамда келісімдікті, тұрақтылықты сақтауға бағытталғанын атап өтті.
– Төтенше жағдайдың енгізілуіне байла­нысты сот тәжірибесінде жекелеген мәсе­лелер туындады. Осыған орай Қазақстан Республикасының Жоғарғы Соты түсіндірме берді. Онда осындай кезеңдегі талап-арыз­дардың, әкімшілік, қылмыстық істердің қабылдануы, олардың сотта қаралуы және мерзімдерінің сақталуына байланысты сұрақ­тар қамтылған. Сондай-ақ азаматтық және азаматтық процестік, қылмыстық және қылмыстық процестік, әкімшілік құқық бұзу­шылық туралы заңнаманы қолдану жөнін­де түсіндірме берілген, – деді аудандық сот төрағасы Руслан Темірханұлы.
Іс-шара барысында аудандық сот төрағасы Руслан Алдамбергенов пен судья Асылхан Мизанбаев сұрақтарға жауап берді.
Айта кетейік, аудандық сотта төтенше жағ­дай режимі енгізілгелі бері Қазақстан Респуб­ликасы ӘҚБтК-нің 476-бабымен (Төтенше жағдай режимiн бұзу) 38 әкімшілік іс қаралып, 23 адамға әкімшілік айыппұл салынған. 14 адам әкімшілік қамаққа алынса, 1 адамға ескерту жазасы қолданылған. Одан бөлек 3 қылмыстық іс, 14 азаматтық іс, 60 әкімшілік іс бойынша сот процестеріне мобильді қосымша және бейнебайланыс көмегімен азаматтардың қашықтықтан қатысуы қамтамасыз етілген.

Ердос БЕРКІНБАЕВ