Соттасатын уақыт емес
Елімізде төтенше жағдай енгізілуіне байланысты коронавирустық инфекцияның алдын алу мақсатында сырдария аудандық соты шектелген жұмыс тәртібіне көшті. Азаматтарды жеке қабылдау, «Ашық есік күні» және іс материалдарымен танысу уақытша тоқтатылды. Бұл ең алдымен сотқа жүгінуші азаматтардың қауіпсіздігі үшін қабылданып жатқан шаралар.Бүгінде сотқа келушілердің сот ғимаратына келуіне уақытша шектеу қойылды. Кейінге қалдыруға процестік мүмкіндігі жоқ істер бойынша сот процестеріне ақпараттық технологиялар қолданылып, «TrueConf» мобильді қосымшасы, бейне конференциялық байланыс көмегімен азаматтардың қашықтықтан қатысуы қамтамасыз етілуде. Осыған орай «Сот кабинеті» қарқынды жұмыс істеуде. Сот жүйесінің ашықтығы мен қолжетімділігін қамтамасыз ету мақсатында аудандық сот азаматтарға әлеуметтік желілер арқылы байланысуға мүмкіндік жасап отыр.
Азаматтар 110210@sud.kz электрондық поштасына және Сырдария аудандық сотының «Faсebook» желісіндегі ресми парақшасына сұрақтарын қойып, жауап ала алады. Қазіргі таңда азаматтардың өмірі мен денсаулығын қорғауды барынша қамтамасыз ететін кезең туындады. Себебі ең қымбат қазына – адамның өмірі мен денсаулығы. Сіздерден орын алып отырған жағдайға түсіністікпен қарауларыңызды сұраймыз.
Төтенше жағдай жарияланғаннан бері азаматтарға тиісті түсіндірме жұмыстары жүргізілуде. Арнайы жадынамалар да таратылып, рейдтік іс-шаралар ұйымдастырылды. Десе де сотқа келушілердің саны азаяр емес. Әрине бұл алаңдарлық жағдай. Сондықтан төтенше жағдай кезеңі соттасатын уақыт емес екенін назарларыңызға саламыз. Оның орнына келісімге келіп, өзара түсінісіп, медиаторлар көмегін пайдаланған абзал. Бұл пандемияның таралуына тосқауыл болады.
Сырдария аудандық сотының дауларды соттан тыс реттеудің жолдарын насихаттау бойынша жұмыс жоспарына сәйкес, Тереңөзек кенті орталығына арнайы билбордтар орнатылды. Аталған билбордтарда татуластыру рәсімдерінің мақсаты, түрлері, қолданылу аясы, кәсіпқой және кәсіпқой емес медиаторлардың тізімі орналастырылған. Сондықтан азаматтар бірден сотқа келмей, бірінші медиаторлар көмегіне жүгінуге болады. Бұл бағытта татулықты ту еткен «Билер кеңесінің» мүшелері де жемісті жұмыс жасауда.
Атап өту керек, аудандық полиция бөлімі арқылы бізге төтенше жағдай талаптарына бағынбаған жеке кәсіпкерлік нысандары жөнінде істер келіп түсуде. Істі қарау барысында дүкен иелері қателіктерін мойындауда. Бірақ ескерту берілмегені, талаптарды естімегені жөнінде өз уәждерін айтады. Жеке кәсіпкерлерді де түсінуге болады. Алайда заң талабы – бәрімізге ортақ. Төтенше жағдай кезінде салғырттық танытуға мүлдем болмайды. Сондықтан жеке кәсіпкерлікпен айналысатын барлық азамат санитарлық талаптарды қатаң сақтауы керек. Бұл дүкен иелеріне ғана емес, әрбір азамат үшін де маңызды. Азаматтар бетперде мен арнайы қолғап киіп жүрсе, өздері үшін пайдалы.
Бүгінде сот өндірісінде бірнеше іс қаралап, бірқатар айыппұлдар салынды. Алдағы уақытта мұндай құқық бұзушылықтар болмас үшін аудандық сот аудан тұрғындарына төтенше жағдай талаптарын сақтауды ескертеді. Бір сөзбен айтқанда, қазір соттасатын уақыт емес. Оның орнына үйде болып, тәртіпке бағынған өзіңізге де, өзгеге де пайдалы.
Р.Алдамбергенов,
Сырдария аудандық
сотының төрағасы
