Аудиоантология аудан құндылығын айшықтайды

Жақында ауданның өнер, мәдениет, әдебиет, руха­ният саласы үшін қуанышты хабарды естідік. Ол ауданнан шыққан әдеби тұлғалардың, өнер қайраткерлерінің, оның ішінде айтыс және жазба ақын­­дарының, әншілердің, саз­­­герлердің шығармалары жи­­­нақталып, аудиоантология құ­растырылатыны жө­ніндегі жаңалық еді. Бұл бұрын-соңды аудан тарихында жүзеге аспаған бірегей жоба.

Бүгінде аудиоантологияға енетін шығармаларды елеп-екшеп, таразылау үшін аудандық мәдениет үйінің жанынан көркемдік кеңес құрылып, жұмыс жа­сау­да. Негізінен жобаны үйлестіру жеке мұрағаттардан шығармаларды жинақтау арқылы жүзеге асады. Антология жұмысымен ақын, «Серпер» жастар сыйлығының иегері, «Сырдария ауданының Құрметті азаматы» Нұрмат Мансұр айналысуда. Аталған жоба туралы бүгінде «Шалқар» радиосында қызмет атқаратын жерлес ақынмен пікірлестік.

– Жоба жыл аяғына дейін жүзеге асады. Антология бірнеше бағыттан тұрады. Мысалы жазба ақындардың аудиоантологиясына Асқар Тоқмағам­бетов, Әбірәш Жәмішев, Оразбек Бес­баев, Балашбек Шағыров, Сейітмұрат Ембергенов, Мұхтар Сақтапов, Әскербек Рахымбекұлы, Жадыра Дәрібаева, Ибрагим Исаев, Қайырбек Асанов, Елубай Әуезов, Бағдат Есназар, Нұрмұхамед Әбілқасымов, Толқын Қабылша және басқа да ақындардың шығармалары енгізіледі. Ол үшін әрбір ақын оқырманға өтімді ой, мағына, ұйқас, образ секілді өлеңге қойылатын талаптарға сәйкес келетін шығармасын ұсыну керек. Сол секілді әншілердің, сазгерлердің, айтыс ақындарының да шығармалары жеке мұрағаттардан жинақталады. Бар­лығы ашық және жария түрде ұйым­дастырылуда, – дейді ақын Нұрмат Абдоллаұлы.

Диск түрінде жарыққа шығатын жинақты қарапайым тілмен «тарихи кітап» деп айтсақ да болады. Антология ауданның әдебиет, өнер, мәдениет саласы үшін құнды қазына болмақ. Жобаның жүзеге асырылу барысы, көр­кемдік кеңес қорытындысы жөнінде алдағы уақытта да ақпараттандыратын боламыз.

Б.ОРДАБЕКОВ