Сырдария ауданының тумасы, айтыскер-ақын, "Серпер" жастар сыйлығының иегері Нұрмат Мансұров республикалық айтыстың бас жүлдесін жеңіп алды.

Жерлестер мақтанышына айналған ақын Нұрмат Мансұров мемлекет және қоғам қайраткерлері Темірбек Жүргеновтің 120 жылдық, Ілияс Қабыловтың 115 жылдық, Социалистік Еңбек Ері Ұзақ Еспановтың 90 жылдық мерейтойы аясында өткен айтысқа Сырдария ауданының атынан қатысып, бақ сынаған болатын.

Жалағаш аудандық Қ.Қазантаев атындағы мәдениет үйінде «Ұлт келбетін ұлықтаған тұлғалар» тақырыбында ұйымдастырылған республикалық ақындар айтысына Қостанай, Алматы, Қызылорда облыстарынан және Орал, Тараз, Астана, Шымкент қалаларынан 12 айтыскер қатысты.

Ақындар айтысын ҚР Еңбек сіңірген қайраткері, ақын Жүрсін Ерман жүргізді.

Айтысқа жырау, домбырашы, ҚР Еңбек сіңірген қайраткері Алмас Алматов бастаған қазылар алқасы төрелік жасады.

Жеңімпаздарға және барлық қатысушыларға Дипломдар мен қаржылай сыйлықтар табысталды.

Сырдария ауданының намысын қорғап, аудан мерейін асқақтатқан ақынды аудан әкімдігі мен аудан халқы атынан мерейлі жеңісімен құттықтаймыз.