Жауапкершілік жүгі арта түседі

Жуырда Мемлекет басшысы Қасым-Жомарт Тоқаев «Мемлекеттік қызмет және сыбайлас жемқорлыққа қарсы іс-қимыл мәселелері бойынша Қазақ­стан Республикасының кейбір заңна­малық актілеріне өзгерістер мен то­лық­тырулар енгізу туралы» Заңына қол қой­ғаны белгілі. Заңға сәйкес ен­ді қара­мағындағы қызметкерлердің жем­қорлық іс-әрекеті үшін басшылар қыз­меттен кетеді.

Аудан әкімі Р.Рүстемовтің төра­ғалығымен өткен жиында аталған заңның талаптары қатаң сақталуы керектігі айтылып, аудан көлеміндегі бірінші бас­шыларға ескерту жасалды. Мемлекеттік қызмет беделіне, халықтың сеніміне селкеу түсірмеу қажет­тігін айтқан аудан басшысы жауапкершілік бірінші бас­шылардан сұралатынын жеткізді.

Ел Президентінің пәрменімен қол­да­нысқа енгі­зілген заң жөнінде аудан әкімі аппаратының мемле­кеттік-құқықтық жұмыстар бөлімінің басшысы Д.Әлшеров хабарлама жасады. Хабарламашының айтуынша, бұдан былай мемлекеттік саяси қызмет­шілер, яғни министрлер мен олардың орынбасарлары, облыстардың, Нұр-Сұлтан, Алматы, Шымкент қалаларының әкімдері мен әкімдерінің орынбасарлары, аудандардың әкімдері тікелей бағынышты қызметкерлері сыбайлас жемқорлық қылмыс жасаған жағдайда отставкаға кетуге міндетті. «Заң­ның жаңа редакциясына сәйкес, бірінші басшы тікелей бағынышты қызметкеріне қатысты соттың айыптау үкімі күшіне енгеннен соң күнтізбелік 10 күн ішінде немесе ақталмайтын негіздер бойынша қылмыстық іс тоқтатылғаннан кейін отставкаға кетуге міндетті», – деген бөлім басшысы нақты кімдердің жауапкершілікке тартылатынын түсіндіріп өтті.

Бірінші кезекте орталық мемлекеттік органның басшысы (министр) – оның орынбасарлары, жа­уапты хатшы немесе аппарат басшысы, аймақтық бөлімшелердің басшылары сыбайлас жемқорлық қылмыс жасаған кезде қызметінен кетеді. Екіншіден, облыс, республикалық маңызы бар қалалар, астана әкімі – оның орынбасарлары, аппарат басшысы, ауданның (облыстық маңызы бар қаланың) әкімі үшін жауап береді. Сонымен бірге орталық мемлекеттік орган басшысының орынбасары (вице-министр) қарамағындағы бөлімше немесе тәуелсіз құрылымдық бөлімше басшысы қылмысқа барса қызметін тоқтатады. Облыс әкімінің орынбасары жергілікті бюджеттен қаржыландырылатын атқарушы органдардың басшылары үшін жауап берсе, аудан әкімі өзінің орынбасарлары, аппарат басшысы, жетекшілік ететін аудандық атқарушы органдардың басшылары, ауыл, кент, ауылдық округтердің әкімдері сыбайлас жемқорлық қылмыс жасаған жағдайда орнынан кетеді. Айта кету керек, «Мемлекеттік қызмет туралы» Заңға сәйкес, мемлекеттік қызметші лауазымға тағайындаған тұлғаға орнынан кету туралы өтініш береді. Отставканы қабылдау немесе қабылдамау – бұл саяси қызметкерді қызметке тағайындаған адамның құзыреті.

Аудан әкімі басшылардың дербес жауапкершілігі туралы тапсырма міндетті түрде іске асатынын жеткізді. Сондықтан әрбір басшы, мекеме қызметкері сенім артылып жүктелген міндетті абыроймен адал атқару керектігін ескертті.

Жиын барысында мұнан бөлек, бұған дейін берілген хаттамалық тапсырмалардың орындалуы, кент және ауылдық округ әкімдерінің өздеріне жүктелген жұмыстарды атқаруы талқыланды. Инди­каторлық көрсеткіштердің қорытындысы нақ­тыланып, жыл аяғына дейін орындалуы керек жұмыстар жөнінде нақты тапсырма берілді. Тапсыр­малардың орындалуы жеке бақылауында болатынын жеткізген аудан басшысы өз міндетіне салғырт қараған дербес бөлім басшылары мен кент, ауыл әкімдеріне кадрлық шешімдер қабылданатынын айтты.

Балтабай ҚАРАМАНТЕГІ