Іңкәрдариялықтар да үлес қосуда

Ардақты ардагерлерді газетке жаздыру жұмысы жалғасып жатыр. Кеше ғана айдарлылықтардың ізгілікті ісін жазып едік, бұрнағы күні Іңкәрдария ауылының мәдениет қызметкері хабарласты. Ауыл мәдениетінің өркендеуіне үлес қосып жүрген Әйгерім Жұмабекова "Мұндай игі іске үн қосу мен үшін мақтаныш. Ауылда елге еңбегі сіңген Батыр ана, еңбек ардагері бар еді. Сол кісіні қуантып, газетке жаздырып берейін. Мұндай игі іске жастар атсалысуы керек" деді.

Құрметті жан, ардақты әже Әсемкүл Бержанованы іңкәрдариялықтар жақсы таниды. Келер жылы тоқсанның төріне шығатын аяулы әженің өнегелі өмірі туралы аудандық "Тіршілік тынысы" газетіне арнайы мақала шықты. Енді алдағы жылдың жартыжылдығында аудандық басылым еңбек ардагеріне тұрақты түрде баратын болады. Осындай кісілерге құрмет көрсетіп, ізгілік танытқан Әйгерім Жұмабекова алғыс білдіреміз!

Үлкендерге деген құрметіміз толастамасын!