Аудан әкімі әлеуметтік нысандарды аралады
Аудан әкімі Руслан Рүстемов Тереңөзек кентіндегі бірқатар әлеуметтік нысандарды аралап, жұмысымен танысты. Аудан басшысына сала бойынша атқарылған және алдағы уақытта жүргізілетін жұмыстар жөнінде мағлұматтар берілді.Аудан әкімі Р.Рүстемов "Сырдариясушар" өндірістік учаскесінде болып, суды пайдалану мен реттеу бағытында жұмыс жасайтын мекемені аралап көрді. "Сырдариясушар" өндірістік учаскесінің басшысы Б.Искаков кәсіпорынның негізгі қызметі, мамандардың біліктілігі және материалдық-техникалық база жөнінде баяндады. Аудан басшысы мекеме жұмысының маңыздылығына назар аударып, егін науқаны кезеңінде шаруашылықтарға бекітілген жоспар бойынша суды уақытылы жеткізу жұмыстарын жандандыру бағытында бірқатар ұсыныстарын айтты.
Мұнан кейін аудан әкімі Р.Рүстемов бір ғимаратта орналасқан аудандық қазынашылық және мемлекеттік кірістер басқармасында болды. Басқарма басшылары өз салалары бойынша жүргізіліп жатқан жұмыстарға тоқталып, қызметкерлердің жұмыс бөлмелерімен таныстырып, негізгі индикаторлардың орындалу барысы жөнінде айтты. Мекеме қызметкерлерімен кездескен аудан басшысы бюджет көлемін ұлғайту, бюджеттің тиімді игерілуін бақылау бағытында жұмыс жасайтын мамандардың жұмысына сәттілік тіледі.
Жұмыс сапары барысында аудан әкімі аудандық тауарлар мен көрсетілетін қызметтердің сапасы мен қауіпсіздігін бақылау басқармасын және "Ұлттық сараптама орталағының" аудандық бөлімшесін де аралады. Мекеме жұмысымен танысып, халықтың санитарлық эпидемиологиялық сауатын арттыру бағытында жүргізілетін жұмыстарға басымдық беру қажеттігін атап өтті.
Аудандық сайлау комиссиясының ғимаратын аралап, атқарылған және алдағы уақытта жүргізілетін жұмыстар жөнінде мағлұматтармен танысқан аудан әкімі Р.Рүстемов ҚР Сайлау туралы Конституциялық Заңының талаптары қатаң сақталу керектігіне назар аударды. Сонымен бірге, аудандық және учаскелік сайлау комиссияларының мүшелері білікті, жан-жақты, креативті идеяларға бай болу керек екенін атап өтті. Сайлау комиссиясының жұмысына жоғары баға берген аудан басшысы саяси маңызды науқандарды абыроймен атқаруға тілектестігін жеткізді.
Сырдария ауданы әкімінің баспасөз қызметі
