Көше тазалығы басты назарда

Өмір сүріп отырған қоршаған ортаны, тұрып жатқан көше бойын, есік алды ауланың тазалығын сақтау­дың адам денсаулығына тигізер пайдасы көп. Осы орайда, аудан тұрғындары тазалақ тұрғысындағы жауапкершілікті сезінуі тиіс. Өйт­кені көше бойын, кентті, ауылды қо­қыспен ластағаннан өзінен бастап өзге тұрғындарға да зияны тиеті­нін ұғынғаны абзал.

Тұрғылықты жерді тазалауға қатысты көктем, күз айларында тазарту айлықтары жүргізіледі. Соған орай биылғы жылдың 7 қыркүйек пен 9 қараша аралығы ауданда санитарлық тазарту, көркейту және көгалдандырудың 2 айлығы болып белгіленді. Осыған байланысты өткен сенбіде сырдариялықтар жалпыхалықтық сенбілікке шықты. Аудандағы мемлекеттік мекеме, дербес бөлім қызметкерлері «Жалын» тынығу лагері жақтан кентке кіретін А.Иманов көшесі бойын күл-қоқыс, шөп-шаламнан тазартты. Сондай-ақ Ж.Құттыбаев, Ғ.Мұратбаев, Д.Қонаев және тағы басқа көшелерге тазарту жұмыс­тары жүргізілді. Мұндай жалпыхалықтық сенбілік барлық ауылда ұйымдастырылды.

«Тазалық – табалдырықтан басталады» демекші, тазалық айлығы аудан орталығына кіреберіс көшелерді тазартудан бастау алды. Алдағы уақытта айлық барысында кент көшелерін тазалау жұмыстары жүреді. Оған кент тұрғындары да атсалысуы тиіс. Өйткені тазалық – баршаға ортақ.

Жалпы, сенбіліктің екіжақты тәрбиелік мәні бар. Біріншіден, бұл көпшілікті еңбекке баулу болса, екінші жағы туған жердің таза, әрі тартымды болуы, яғни ішкі мәдениеттілікті қалыптастырудағы маңызы зор.

Е.БЕРКІНБАЕВ