Аудандық ішкі сая­сат бөлімінің қолдауымен, «Алғыр ой» коммерциялық емес жеке қордың (төрағасы Ғ.Болғанбаев) ұйымдастыруымен Астананың 20 жылдығы, Қызылорда қаласының 200 жылдығы және ауданның 90 жылдығына орай Сырдария спорт клубының базасында мүмкіндігі шектеулі жас­тар арасында зілтемір көтеруден аудан біріншілігі өткізілді.
14-29 жас аралығындағы жастар арасында ұйым­дас­тырылған сайысқа кент пен ауылдардан 12 спортшы қатысты. Біріншіліктің ашылуында спорт ардагері М.Елеу­сінов зілтемір көтеруден бірнеше мәрте әлем чемпионы О.Медетбаев, аудандық мүге­дектер қоғамы төрағасының орынбасары Б.Жантүгелов жастарға құттықтау тілектерін білдіріп, жыл сайын ауданда ауыр атлетикаға қатысушылар саны артып отырғанын айтты. Соның куәсіндей осы біріншілікке кенттен Жасұлан Жүсіпбеков, ауылдан Сәбит Усманов бірінші рет қатысты. Сайыс барысында спортшылардың бәсекесі қыза түсті. Ешқайсысы да оңайлықпен берілгісі келмеді. Зілтемірді әр түрлі салмақ дәрежесі бойынша бірнеше мәрте көтергеннен кейін, мықтылар іріктеле бастады. Сонда да бәсеке толастаған жоқ. Ақтық сайыста ең жоғары салмақ көтерген қалжанахундық Жасұлан Жүсіпбаев аудан чемпионы атанды. Тереңөзектіктер Ербол Назаров екінші орынды, Нұржан Қаратаев үшінші орынды иеленді.Жарыс қорытындысында жеңімпаздар диплом мен арнайы сыйлыққа, ал жарысқа қатысушылардың барлығы ынталандыру сыйлығына ие болды.

Ш.БАЛТАБАЙҰЛЫ