Турнир Қазақстан шахмат федерациясы мен ҚР Парламенті Сенатының және облыстық ардагерлер Кеңесінің қолдауымен үшінші жыл қатарынан өткізілді. Іріктеу кезеңдері еліміздің көптеген өңірінде ұйымдастырылып, шахматты кеңінен насихаттауға арналды.

Интеллектуалдық спортты да­мытуға мүмкіндік берген чем­пио­натқа Қызылорда қаласы мен аудан­дардан 28 ойыншы келіп, өзара мықтыны анықтау үшін швейцар жүйесі бойынша 9 тур ойналды.

Жарыстың мақсаты – тұрғындар арасында шахматты зияткерлік дамудың тиімді құралы ретінде кеңі­нен насихаттау, ардагерлердің спорт­тық белсенділігін арттыру және 2026 жылғы Сенат кубогының 1/4 финалына жолдама алатын үздік ойын­шыларды анықтау болды. Сондай-ақ бұл турнир ардагерлердің бос уақытын тиімді ұйымдастырып, саламатты өмір салтын қалыптастыруға да ықпал етті. Жарыс нәтижесі бойын­ша үздік шыққан алғашқы 20 адам ширек финалға жолдама алды.

Айта кетейік, аудандық ардагерлер кеңесінің ұйымдастырып жарысқа жіберген 9 шахматшы ардагердің 7-еуі жүлдегер қатарынан көрінді.

Турнир қорытындысы бойынша әр ауданның үздік ойыншылары мен жарыс жеңімпаздары, жүлдегерлер ақшалай сыйлықпен марапатталды. Сырдариялық ардагерлер арасынан Нағи Ілиясов ауылынан 86 жастағы қарт Еркін Бекенов үздік ойыншы атанды. Сонымен қатар Аманкелді ауылының қос қариясы 80 жастағы Жеңісбек Омаров пен 78 жастағы ардагер Қайролла Жүсіпбеков, Нағи Ілиясов ауылынан Анықбек Қаймолдаев, қалжанахундық Айтан Мұстафаев, аманкелділік Исабай Жүсіпов аудан ардагерлерінің атынан тартысты ойын өрнегін көрсетті.

Спорт саласының ардагері, Мек­теп­хан Елеусінов осы турнирде облыс чемпионы атанды. Жеңімпаз ардагер алдағы уақытта аймақ намысын қорғап, республикалық деңгейде бақ сынайды.