Азия құрлығы чемпионатының ерек­шелігі – сайыс екі жыл сайын ұйымдастырылып, оған 35 жастан асқан спортшылар қатысады. Додаға қатысушылар тек медаль үшін бақ сынап қоймай, саламатты өмір салтын насихаттауға да үлес қосады.

Жеңіл атлетика – еліміздің спорт саласындағы басты бағытының бірі. Үндістанда өткен Азия чемпионатында бақ сынаған қазақстандық спортшылардың арасында жерлес­теріміз де жас ерекшеліктері бойынша жарыс алаңына шықты.

Атап айтқанда спорттық жаяу жүруден 5000 метр қашықтыққа жарыс алаңына шыққан спортшы Э.Райымқұлова екінші орынды алды. Бұл спорт түрінен 16 мемлекеттен келген спортшы қыздар қатысып, ел намысын қорғаған Эльмира үздіктер қатарынан көрініп, күмістен алқа тақты. Сондай-ақ 19 спортшы қатысқан стипльчез – 2000 метр қашықтықта кедергілер арасынан жүгіруден де сырдариялық жеңіл атлет жүлделі екінші орын алып, намыс­ты қолдан бермеді.

Kazakhstan Masters Athletic командасы құрамасында өнер көрсеткен қос сырдариялық спортшы – 35-39 жас аралығындағы сайыпқырандар.

– Осы жылдың қараша айының 5-10 аралығында өткен халықаралық сайыс өте жоғары дәрежеде ұйым­дастырылды. Қазақстан құрама командасында өнер көрсеткен біздің спортшылар жүлдегерлер қатарынан көрініп, еліміздің намысын қорғады. Бұл сайыс екі жылда бір рет өтеді. Тыңғылықты дайындықпен келген спортшылардың арасында жасы жет­пістен асқан қариялар да болды. Бұл негізінен бұрын спортпен кәсіби тұрғыда айналысқандар үшін өтетін немесе әуесқойлардың бақ сынайтын сайысы. Жеңіл атлетикадан өткен са­йыс біздің ел спортшылары үшін табыс­ты өтті. Жаңа рекордтар орнатылып, алтыннан алқа таққандар да болды, – дейді сырдариялық жаттық­тырушы.

Айту керек, «Masters Athletics» – бәсі жоғары, әуесқойлар мен бұрынғы кәсіби спортшыларды біріктіретін халықара­лық сайыс.