Қазақстан рекордын жаңартқан қадам

Сыр елі ақ күрішімен, әнші-жыршыларымен ғана емес, спорт саңлақтарымен де танымал. Сөзімізге дәлел – жерлесіміз Эльмира Раимқұлова жақында ғана Қазақстан Республикасының рекордын жаңартты.

Жақында Алматы қаласында жеңіл атлетикадан Қазақстан Республикасының чемпионаты және «Alatau-2025» International Masters Athletics Tournament халықаралық турнирі өтті. Атал­­­­ған жарысқа тереңөзектік спорт саңлақтары қатысып, жеңіс төрінен табылды. Аудан­дық спорт клубының жеңіл атлетика жаттықтырушысы Эльмира Раимқұлова ұзындыққа секіру­ден 2-орын, ядро лақтыру бойынша 1-орын, 2000 метр кедергіден жүгіруден 1-орын және 5000 метр спорттық жаяу жүруден 1-орын иеленіп, Сыр спортының жұлдызын жағып, аудан мерейін асырып келді. Сондай-ақ осы салада шәкірт тәрбиелеп жүрген спортшы 2000 метр кедергіден жүгіруден Қазақстан Республикасының ре­кор­дын жаңартып, ауданның ғана емес, облыстың атын әуе­летті.

Аталған жарысқа Қырғызстан, Ресей, Өзбекстан, Болгария, Беларусь, Украина елдерінен спортшылар қатысқан. Ал жер­лесіміз бұл байқауға бір жыл бойы тыңғылықты дайындалып, нәтиже көрсетіп отыр. 35-39 жас аралығындағы қарсыластарын басып озған Эльмира Қазақстан Республикасының Чемпионы ата­нып, рекордты жаңартты. Желаяқ спортшы ұзындыққа секіру бойынша 3,36 метрді бір дегенде секірсе, 5000 метрді 34 минутта жаяу жүріп, 2000 метрді кедергілерге қарамастан 9 минут 56 секунд ішінде жүгіріп өткен. Спортта әр минут, әр секунд маңызды екенін еске түсірсек, жерлесіміздің бірнеше жыл бой­ғы еңбегінің ақталғаны зор мақ­таныш.

– Кішкентай кезімнен бастап спортқа құмар болдым. Мектепте оқып жүргенде жүгіру, мылтық ату және жүзумен айналыстым. Кикбоксингтен спорт шеберін орнаттым. 2019 жылға дейін бас­кетбол, гандбол ойнадым. 2019 жылы сәуір айында аяғымнан қатты жарақат алып, 2020 жылдан бастап жүгірумен айналыстым. Балалық арманым жүгіру спортында өзімді шыңдап, нәтижеге жету болды. Шет елдерде Қазақстан Туын көтеріп, спорт саласына өзіндік үлесімді қосуды мақсат еттім. 2023 жылы Филиппин елі Манила қаласында өткен «Азия Masters» Чемпионатында жеңіл атлетикадан 10 шақырым қашықтықта 2-орын иелендім. 2024 жылы қараша айында Түркияда өткен Стамбул марафонында 4-орын бұйырды. 42,195 шақырым қа­шық­тықта жүгіріп, «10 үздік спортшы» қатарына кірдім. Ал 2025 жылдың қаңтар айында Дубай марафонына қатысып, 2025 жылдың сәуір айында өткен Мос­ква 21,195 шақырым жартылай марафонына жолдама алдым. Сол елде жүгіріп, 2026 жылы өтетін Лондон марафонына жолдама алдым, – дейді спортты жанына серік еткен Эльмира.

Айта кетейік, жерлесіміз Алматы қаласында өткен жеңіл ат­летикадан Қазақстан Рес­публикасының Чемпионатында жүл­­демен қатар Үндістанның Чен­­най қаласында болатын «Азия Masters» жеңіл атлеттер жа­ры­сына жолдама жеңіп алған. Бір күні де жаттығусыз өтпейтін спортшы алдағы күз айларына жос­парланған Үндістан сапарына дайындықты қазірден бастап кеткен.

Аружан МҰХАНБЕТҚАЛИ