Іс-шараны ауыл әкімі Нұрбол Жұмабеков ашып, өске­лең ұрпақтың саламатты дамуына мүмкіндік берген спорт клубының демеушілерін атап өтті.

– 2023 жылы Анар Қалдыбаеваның аудандық мәс­лихат депутаты болып тұрған кезінде жеке кәсіпкер Назерке Қанатбектің демеушілігімен ауылда ескі балабақша ғимаратын спорт залға лайықтандыру үшін 3,5 млн теңгеге күрделі жөндеу жұмыстары жүргізілген болатын. Қазіргі таңда сол ғимаратты спорт мектебіне бағыттап, «Қазақстан халқына» қоры­ның қаржыландыруымен, «Батыр боламын» қоғам­дық қорының қолдауымен 8,8 млн теңгеге керек­ті құрал-жабдықтар алынып, ауыл балаларының спортпен шұғылдануына мүмкіндік жасалды. Бүгінде спорт клубында 1 еркін күрестен жаттықтырушы және қоғамдық жұмыс арқылы 3 адам қызмет етуде. Бұл бастама арқылы келешек ауылымыздан әлемге әйгілі спортшылар шығатынына сенімім мол, – деді ауыл әкімі.

Спорт клубының ашылу салтанатына арнайы «Батыр боламын» қоғамдық қорының құрыл­тай­шылары Арман Уахап пен Асыл Уахап және президенті Ернұр Сәбікенұлы, сондай-ақ әлеуметтік желі белсендісі, елге «NNN» лақап атымен танымал бло­гер Нұрдәулет Бектұрсын қатысып, тұрғындарды жаңа бастамамен құттықтап, ел намысын қорғайтын спортшылар шығуына тілекші екендіктерін жеткізді.

«Қазақстан халқына» қорының қаржы­лан­дыруы­мен, «Батыр боламын» қоғамдық қорының қол­дауымен спорт клубына арнайы үстел теннисі жиынтығы, жаттығу құралдары, спорттық киімдер, қабырғаға және жерге төсеуге арналған матрастар алынған. Сонымен қатар, еркін күрес, бокс, шахмат, теннис үйірмелеріне арналған арнайы бөлмелер жабдықталған. Қазіргі таңда аталған спорт клубында 50 бала спорт секцияларына тұрақты қатысуда. Сондай-ақ спорт клубында ауыл тұрғындары күн­делікті жаттығу жасап, саламатты өмір салтын қалып­тастыру үшін жұмыс істеуде.