Жетістігі көп жас спортшы

Ол Тереңөзек кентіндегі №11 балалар және жас­өспірімдер спорт мектебінің таеквондо үйірмесіне бес жасынан бастап барды. Өзі де осы спорт түріне барғанды қолай көрді. Әкесі де баласының қабілеті осы жылдам спорт түріне келетінін байқады. Ғани бастапқыда таеквондо үйірмесіне досы Диаспен бір­ге қатысып жүргенде тым кішкентай болғандықтан, басқа бапкерлер оларды ағаларының жарысын кө­руге келген екен деп ойлап қалыпты. Олардан бо­лашақта мықты спортшылар шығатынын қайдан білсін?! Сонымен Ғани Шахарбек 0-сыныптан бастап спорт үйірмесіне қатысты. Жаттығудан бірде-бір рет себепсіз қалған емес. Сабағын да үздік оқиды.

Спорт үйірмесінде Ғаниды алғашқы жылы Бақытжан Баймырзаев жаттықтырса, үш жылдан бері ауданға белгілі бапкер Марат Алдабергенов таеквондадан тәлім береді. Ғаниға қашан да қайсарлық тән. Әрдайым алдына қойған мақсатын орындауға ұмтылады. Өз қатарластары арасында үш жыл қатарынан облыс чемпионы атануы – соның айғағы. Осындай ынта мен жігердің арқасында биыл Тереңөзек кен­тінде өткен ҚР чемпионатына іріктеу сайысында шеберлік танытып, республика чемпионатына жолдаманы ұтып алды. Сөйтіп биылғы жылғы қазанның 3-5 аралығында Астана қаласында өткен ҚР чемпионатына қатысып, 30 келі салмақ дәрежесінде бақ сынады. Кішкентай спортшы рес­публикалық рингте қарсы­лас­тарын бірінен кейін бірін ұтып, ақтық сайысқа шықты. «Бақ шаба ма, бап шаба ма» деген. Финалда маңғыстаулық спортшымен сынға түсіп, аз ғана ұпаймен ұтылды. Сөйтіп, «Қазақстанның вице чемпионы» атанды. Сай­ыстың қорытындысы бо­й­­­­­­­­ынша ҚР спорт шеберлігіне үміт­­кер нормативін орындады. Тоғыз жасар чемпионның аға­сы Айдын да спорт десе ішкен асын жерге қояды. №36 мек­теп-лицейдің 7-сыныбында оқи­тын ол – оқу үздігі. Айдын №11 балалар мен жасөспірімдер спорт мектебінде қазақша кү­рес­ке қатысып, шыңдалып келе­ді. Аудандық, ауданаралық бірінші­ліктерде жүлделі орындарды еншілеп жүр. Жастайынан спорт­қа ден қойып, Сыр елінің даң­қын асқақтатуды мақсат еткен болашақ чемпиондардың атасы, ардагер-журналист Шаһарбек Нұрсейтов аудан намысын қорғап жүрген немерелерін мақтан етеді. Денсаулықтары мықты болып, ер жігітке тән мықты спортшы болып өссе деп армандайды.

Ал кішкентай Ғанидың бап­кері Марат Алдабергенов жас спортшының таеквондоға деген ын­тасы ерекше екенін айтады.

– Ғани кішкентай кезінен осы спорт түріне бейімделіп, бар ынта-жігерін салып ке­леді. Бұ­ған дейін де талай шың­дарды бағындырып үлгерген спорт­шы­ның республикалық дең­гейде вице чемпион атануы – Сыр елінің қуанышы деп білеміз. Чемпио­натқа дейін қызу дайындық болды. Сайысқа республиканың түк­пір-түкпірінен таеквондошылар қатысты. Ғанидың салмақ дәрежесінде 40-тан астам бала болды. Бабы мен бағы қатар шапқан Ғаниымыз ақтық мәреге дейін оза шапты. Соңғы шешуші сәтте маңғыстаулық спортшыдан бір ұпай ғана кем шықты. Спорт болған соң түрлі жағдай болады. Ғанидың болашағы алда, мен одан үлкен үміт күтемін, – дейді М.Алдабергенов.

Үлкен шаһардағы ауқымды бәсекеде шағын ауданымыздың намысын қорғап, жеңіс төрінен көрінген Ғани Шахарбекті кезекті жетістігімен шын жүректен құт­тық­таймыз. Республика күні ме­ре­кесі қарсаңында Сыр еліне лайықты тарту жасаған жас да­рын­ның болашағы жарқын, же­ңісі баянды болсын деп тілек білдіреміз.

А.МҰХАНБЕТҚАЛИ