Жас зияткерлер өзара бақ сынады
Зияткерлік ойындар адамның рухани байлығы мен мәдениетінің дамуына зор ықпал етеді. Адамның ұшқыр ойы мен тапқырлығы сыналатын зияткерлік спорт түріне шахмат спорты да жатады.Әлемге кеңінен таралған шахмат ойынымен тұрақты айналысушылар қатары көп. Бұл ретте, «Болашаққа бағдар: рухани жаңғыру» бағдарламасы шеңберінде зияткерлік ойындар кеңінен насихатталып келеді. Жыл сайын 20 шілдеде «Халықаралық шахмат күні» тойланады. Айтулы күнге байланысты жасөспірімдер арасында шахматтан Тереңөзек кенті біріншілігі тұңғыш рет спорттық-зияткерлік орталығында өткізілген болатын.
Екі күнге созылған біріншілік барысында жас шахматшылар өзара бақ сынады. Ойы ұшқыр зияткерлер бір-бірінің жүрісін бағамдап, жүйрік болуға талпынды. Жаттықтырушының нұсқауы бойынша арнайы әдіс-тәсіл ұйымдастырған жас шахматшылар қатарластарынан оза шапты. Бәсекенің көркін қыздырған оларға шахмат ойынының үздіктері жайында мол мағлұмат берілді. Әлемдік аренада қазақ спортшыларының өзіндік орны бар екені, зор жетістікке жету жолында үздіксіз ізденіс керектігі айтылды. Сонымен бірге жарысқа белгілі бапкерлер Білімжан Елеусінов пен Мұхтар Әбжаппаров төрелік жасады.
– «Балалар жылы» аясында ауданымызда шахмат үйірмелері жұмыс жасай бастады. Жігері мықты, жеңіске деген талпынысы жоғары жас шахматшылар көптеп келуде. Оларға бұл спорт түрінің маңыздылығын, негізгі әдіс-тәсілін үйретудеміз. Шахмат ойынына қатысып, зор табысқа қол жеткізген үлкен буын өкілдері жетерлік. Тәжірибелі спортшылардың жүріп өткен жолы – кейінгі жас ұрпаққа үлгі-өнеге. Қазіргі уақытта аудан көлемінде шахмат спорты жақсы дамып келеді. Осыдан 30-40 жыл бұрын Тұрғанбай Болғанбайұлы бастаған шахматшылардың сара жолын жастар жалғайтынына сенім мол. Бүгінгі жарыста 8 жасқа дейінгі және 8 жастан жоғары балалар арасында жеңімпаз анықталды, – дейді спорт ардагері М.Елеусінов.Тереңөзек кенті біріншілігінің жабылу салтанатына Тереңөзек кенті ардагерлер кеңесінің төрағасы Зайдағали Жүсіпбайұлы, «Қазақ тілі қоғамы» ҚБ Сырдария аудандық филиалының төрағасы Шаһарбек Нұрсейітов, ардагер-шахматшы Бақтыбай Матыбаев қатысып, балғын спортшыларға ақжарма тілегін арнады. Жарыс қорытындысы бойынша 8 жасқа дейінгі шахматшылар арасында І орынды Санжар Рахметов, ІІ орынды Нұржігіт Нұрым, ІІІ орынды Нұрәділ Боранбай иеленді. Ал 8 жастан жоғары балалар арасында І орынды Төрехан Тоқшылық, ІІ орынды Нұрәлі Сайлаубайұлы, ІІІ орынды Айым Төлетаева иемденді. Өз кезегінде біріншілік жеңімпазы мен жүлдегерлеріне арнайы диплом табысталды.
Балтабай ОРДАБЕКОВ
