Тіршілік тынысы Tirshilik-tynysy.kz ақпараттық агенттігі
» » Ауыл тұрғындары таңдау жасады

Ауыл тұрғындары таңдау жасады

Тәуелсіз мемлекетімізде тағы бір саяси науқан аяқ­талды. Бұл жолы ел-жұрт тұңғыш рет ауыл, кент, ауылдық округ әкімдерін сайлады. Бұл бастаманы ел Президенті Қасым-Жомарт Тоқаев 2020 жылғы 1 қыркүйектегі «Жаңа жағдайдағы Қазақстан: іс-қимыл кезеңі» атты Жолдауында айтқан болатын. Яғни 2021 жылдан бастап ауыл әкімдерінің тікелей сайлауын өткізу туралы тапсырманың орындалуы 25 шілдеге сәй­кес келді.

Еліміз бойынша өткен ауыл әкім­дерінің сайлау қорытындысы аз уақытта белгілі болады. Ауыл әкім­дігіне ұсынылған кандидаттар саяси партиялар және өзін-өзі ұсы­ну­шылар қатарынан болды.

Ауданда Нағи Ілиясов, Асқар Тоқмағамбетов, Іңкәрдария ауыл­дық округі бо­йынша ауыл әкімдерін сайлау өз дәрежесінде өткендігі туралы мә­лі­мет келіп жетті. №165, №154, №161 сайлау учаскесінде жалпы саны 2808 сайлаушы болса, оның 92,02 пайызы дауыс берген.

Сайлаудың өту барысын ақ­па­раттандырған аудандық газеттің жур­налистері де осы күні сайлау өткен 3 сайлау учаскесіндегі ахуалды бағамдады.

Барлық сайлау учаскесі өз жұ­мысын таңғы сағат 7.00-де бастап, алғашқы сайлаушыларын қар­сы алды. Дәстүрмен Мемлекеттік Гимн орындалып, алғашқы дауыс бергендер сыйлыққа ие болды.

– Ауыл тұрғындары әкімді сайлауда белсенділік танытты. Осы уақытқа дейін ауыл әкімін депутаттар сайласа, енді тұрғындар өз­дері таңдау жасайды. Бұл – еліміз­дегі демократиялық үрдістің нақты көрінісі. Ауыл тұрғындары елге жанашыр, сенімнен шығатын, бедел­ді, туған жерді өркендетуде аянып қал­майтын азаматты таңдай­ды деген сенімдемін, – деді А.Тоқмағам­бетов ауылының тұрғыны, еңбек ардагері Уәйда Бахтияров.

Ал Аружан Абдрахманова Нағи Ілия­сов ауылындағы №165 сайлау учаскесіне келіп, алғаш рет сая­си науқанға қатысушы ретінде сайлауға қатысты. Ол ауылдағы 1330 сайлаушының ішінде ауыл әкі­міне үміткерге өз дауысын берді.

– Ауылдың өркендеуіне, дамуы­на жұмыс істейтін лайықты кандидат сайланатынына сенеміз. Ха­лық үніне құлақ асатын әкімнің сай­лануы біз үшін маңызды. Өзім жастардың өкілі ретінде дауыс бер­геніме қуаныштымын, – дейді Аружан Абдрахманова.

Ауданнан шалғай жатқан елді мекен Іңкәрдария ауылында 512 сайлаушы бар. Таң атқан­нан бас­тап сайлау учаскесіне кел­ген­дер­дің бірі – еңбек ардагері Құрал­бай Қалбабаев. Ардагер – көп жыл ша­руа­шылықта еңбек еткен азамат.

– Таңдауымды жасадым. Ауыл әкімін тұрғындардың сайлауы өте құптарлық жағдай. Ел Прези­ден­тінің бастамасымен қабыл­дан­ған шешім нағыз ашықтықты көрсетіп отыр. Себебі, ауыл тұрғын­дары ел қамын ойлайтын, халықтың мүд­десіне қызмет ететін елжанды азаматқа дауыс береді. Туған ауылымыз алдағы уақытта гүлденген ауыл қатарына қосылады деген ойдамыз, – дейді ауыл тұрғыны Қ.Қалбабаев.

Айта кету керек, облыс бойын­ша ауыл әкіміне түскен үміткерлердің ор­таша бәсекелестігі 3 адамнан кел­ді.

Бибісара ЖАНӘЛІ
27 шілде 2021 ж. 340 0