Тіршілік тынысы Tirshilik-tynysy.kz ақпараттық агенттігі
» » Көше тұрғындарының татулығы

Көше тұрғындарының татулығы

Қазақта «Екі дүниең абат болсын, екі тойың қабат болсын» деген тамаша тәмсіл бар. Сол айтқандай, Тереңөзек кентінің Бақтияр Жақып атындағы көшенің тұрғындары айлардың Сұлтаны Рамазан мен Ұлыстың Ұлы күні Наурыз мейрамын қатар атап өтті.

Асқар ауылының атақты күрішшісі соғыс ардагері Б.Жақып атындағы көше кент­тің Жаңа қоныстану аймағындағы соңғы 6-7 жылда қалыптасқан көшеге саналады. Соған қарамастан тұрғындары өте ұйым­шыл, әсіресе жастар. Олар Жұлдызай, Гүлзат, Айжан, Мақпал, Әсел тағы басқалар көше тұрғындарын ұйымдастырып, Ораза ұстаған­дарға ауызашар берді. Мерекеге орай ән-думан ұйымдастырды.

Көпшіліктің көңілінен шыққан дастарқанда көше­нің үлкені Серік Жақия жастарға риза болып бата берді.

– Көшемізге өткен жылы жарық тартылып, асфальт төселді. Бұл үшін іс басында жүрген азаматтарға алғыс айтамыз. Рамазан айы мен Ұлыстың Ұлы күні татулық пен тазалықты сүйеді. Шүкір, татулығымыз өте жоғары. Әрбір тұрғын өз үйінің алдын таза ұстаса, нұр үстіне нұр болады. Бүгінгі жасап жатқан өнегелі істеріңізге Алла риза болсын, – деді ол.

Мерекеден тұрғындар жоғары көңіл күй­мен тарқасты.

Шаһарбек Нұрсейіт,
ардагер журналист,
көше комитетінің төрағасы
30 наурыз 2024 ж. 102 0